Исроил армияси ҲАМАС террорчилик ҳаракатининг махфий маълумотларни олиш мақсадида ҳарбийларни мафтун қилиш режаларини фош қилди. Бу ҳақда The Jerusalem Post хабар берди.
Жиноий тармоқни очиш бўйича операция «Юракларни синдирувчилар» деб номланган ва жорий йилнинг март ойида бошланган. Бузғунчилар ҳеч қандай муҳим маълумотни олишга муваффақ бўлмаган, бироқ миллий хавфсизликка жиддий таҳдид юзага келган.
ҲАМАС аъзолари ижтимоий тармоқларда сохта аккаунтлар очган, террорчилар оддий фуқаролар ниқоби остида ҳарбийлар билан танишган ва улардан Google Play’даги танишувлар дастурларини телефонга ўрнатишни сўраган. Қурбонлар дастурни юклаб олгач, қурилмага вирус тушган ва унинг ёрдамида террорчилар телефондаги турли маълумотларга кириш имконига эга бўлган.
Хабар берилишича, Google шубҳали дастурларни Google Play’дан ўчириб ташлагунга қадар улар тахминан 500 марта юклаб олинган.
Армия томонидан қайд этилишича, эркак ва аёлларни мафтун қилишга бирдек уринилган. Бунда қизлар янги танишилган номаълум кишилар билан алоқани эркак ҳарбийларга қараганда тезроқ узган.
Ҳарбийлар ижтимоий тармоқларда номаълум кишилардан дўстлик таклифини қабул қилмасликка, ҳар қандай шубҳали субъектлар ҳақида хабар беришга ва номаълум дастурларни юклаб олмасликка чақирилган.
Изоҳ (0)