“O‘zbekipaksanoat” uyushmasi bilan hamkorlik bo‘yicha memorandum imzolagan Jampur Group kompaniyasi Prezidenti Muhammad Shafiq O‘zbekiston haqidagi taassurotlarini so‘zlab berdi.
O‘zbekiston haqida avval ham eshitganman. Bugun o‘z ko‘zim bilan ko‘rdimki, eshitganlarimdan ham a’lo ekan. O‘zbek xalqi azaldan tadbirkor, mehnatkash xalq ekaniga iqror bo‘ldim. Bunday deyishimga to‘la asoslarim bor.Albatta, kirib borayotgan bozorimizni avvalo, yaxshilab o‘rganamiz. Marketing tadqiqotlari olib boramiz. O‘zimizdan qiyos: joriy yilning 14-mayida kompaniyamizning maxsus ishchi guruhini O‘zbekistonga yuborgan edik. Ular turli tarmoq vakillari bilan uchrashdi, yurtingizda investorlarga yaratilgan sharoitlar, turli sohalar, xususan, ipakchilikda yaratilgan imkoniyatlar bilan yaqindan tanishgan edi.
Ular borgach, biz tahlil qilib ko‘rdik, bir qancha omillar bizga ma’qul keldi. Agar ipakchilik sohasi misolida aytadigan bo‘lsak, bu borada berilgan imkoniyat va yaratilgan imtiyozlar bizga ma’qul keldi: 2023-yilgacha barcha soliqlardan ozod etilgani, kommunal to‘lovlarni boshqa davlatlarga nisbatan arzonligi, ishlash istagidagi yoshlarning ko‘pligi, sohada rivojlanish boshlanganini aytish lozim.
To‘g‘risini aytsam, kompaniyamiz hozirga qadar transport, aviatsiya, qishloq xo‘jaligi, tog‘-kon metallurgiya sanoatida foydalaniladigan texnologiyalar va uskunalar ishlab chiqaradi. Shu sohada tashish xizmatlarini olib boramiz. Xususan, dengiz transportida gaz, neft mahsulotlarini tashuvchi yirik barjalarimiz bor. Elektr energiya ishlab chiqaruvchi GESlar qurish va ularni ishga tushirish borasida ham yetarlicha tajribaga egamiz. Biroq, ipakchilik bilan hozirgacha shug‘ullanib ko‘rmagan edik. Endi o‘zimizni shu sohada ham sinab ko‘rish va “O‘zbekipaksanoat” uyushmasi bilan hamkorlik qilishga ahd qildik. Ayni vaqtda dunyoning 30 davlatida ipak ishlab chiqarilsa-da unga 200 dan ortiq davlat talabgor. Demak, bu sohaga sarmoya tiksa, albatta, foyda keladi.
Kompaniyamiz tashkil etilganiga 35 yil bo‘lgan bo‘lsa, 30 yildan buyon qishloq xo‘jaligi mahsulotlarini yetishtirish va eksporti bilan shug‘ullanamiz. Xitoyning yirik kompaniyalari bilan hamkorlik qilamiz. Bosh ofisimiz Dubayda joylashgan bo‘lsa-da Afrika, Yevropa va Osiyoning ko‘pgina davlatlarida vakolatxonamiz ishlab turibdi.
Biz, “O‘zbekipaksanoat” uyushmasi raisi B. Sharipov bilan hamkorlik borasida kelishuv memorandumi imzoladik. Bizning ipakchilik sohasidagi faoliyatimizni qo‘llab-quvvatlash maqsadida ikkita loyiha taklif etilmoqda. Birinchisi, Toshkent viloyatidan “nol” qiymatda yer berishmoqchi. Unga sarmoya tikib, bino tiklash va mablag‘ning qaytishini ikki—uch yil kutish kerak. Shuning uchun bizga ikkinchi taklif: Qashqadaryo viloyatida ishlab turgan qayta ishlash korxonasiga 50 foiz ulush bilan kirish ma’qul keldi.
Albatta, O‘zbekistonda ishlash biz uchun sharaf. O‘g‘lim va qizim shu yerda ish yuritmoqchi. Shu bois hozircha, 50 foiz ulush bilan qo‘shilsak, kelgusida albatta, o‘zimizning ipakchilik korxonamizni bunyod etamiz. Biz, Buxoroda ipakchilik, Navoiy viloyatida tog‘-kon metallurgiya sohasidagi ishlar bilan tanishish niyatidamiz.
Muhammad Shafiq, Jampur Group kompaniyasi prezidenti
Izoh (0)