Innovatsion rivojlanish vaziri Ibrohim Abdurahmonov Jahon bankining Yevropa va Markaziy Osiyodagi moliya, raqobatbardoshlik va innovatsiya masalalari bo‘yicha Global amaliyot sektori rahbari Marializa Motta bilan uchrashdi. Bu haqda “Daryo”ga vazirlik matbuot xizmati ma’lum qildi.
Uchrashuvda, shuningdek, Jahon bankining Markaziy Osiyodagi hududiy idorasi bosh iqtisodchisi Stefka Slavova va Jahon bankining O‘zbekistondagi vakolatxonasi xodimi Serdar Jeparov ishtirok etdi.
Ta’kidlash joizki, Ibrohim Abdurahmonov va Marializa Motta joriy yil aprel oyida Bratislavada uchrashgan, o‘sha paytlari endigina tuzilgan Innovatsiya vazirligining vazifalari, maqsadlari haqida fikr almashishgan edi. Shu bois ham Motta xonim Toshkentga tashrifi doirasida uyushtirilgan uchrashuvlarni Innovatsiya vazirligidan boshlagan bo‘lsa, ajabmas.
Uchrashuv davomida vazir Innovatsion rivojlanish vazirligi tomonidan amalga oshirilgan ishlar haqida gapirarkan, vazirlik tomonidan ishlab chiqilgan va tez kunlarda jamoatchilikka taqdim etilishi kutilayotgan O‘zbekiston innovatsion rivojlanish strategiyasi haqida to‘xtaldi.
Marializa Motta Innovatsiya vazirligi tomonidan qisqa fursatlar ichida amalga oshirilgan va oshirilayotgan ishlarga ijobiy baho berib, Jahon Banki respublikaning innovatsion faoliyatini rivojlantirishga qisqa yoki uzoq muddatli zayomlar berishga tayyor ekanini aytdi.
Jahon banki tomonidan beriladigan zayomlarning shartlari va hajmi keyingi muzokaralargacha tomonlar o‘rtasida muhokama qilinishi haqida kelishib olindi.
Izoh (0)