20-iyun kuni Oliy Majlis Qonunchilik palatasining navbatdagi majlisida deputatlar mamlakatni rivojlantirishning bugungi bosqichida muhim ahamiyatga ega bo‘lgan va amalga oshirilayotgan ijtimoiy va iqtisodiy islohotlarni jaddalashtirishga qaratilgan bir qator qonun loyihalarini ko‘rib chiqdi. Bu haqda palata rasmiy saytida xabar berildi.
Majlisda shuningdek, “Milliy tiklanish” demokratik partiyasi fraksiyasi tashabbusi bilan bir guruh deputatlar tomonidan quyi palata muhokamasiga kiritilgan “Jamoat joylarida chilim va elektron sigaretalarni chekishni cheklash to‘g‘risida”gi qonun loyihasi ikkinchi o‘qishda ko‘rib chiqildi.
Ta’kidlanganidek, mazkur qonun loyihasi fuqarolarning sog‘lig‘ini chilimlar va elektron sigaretalarning zararli ta’siridan, u bilan bog‘liq ijtimoiy va boshqa salbiy oqibatlardan muhofaza qilishga, xususan yoshlar o‘rtasida sog‘lom turmush tarzini qaror toptirishga, shuningdek butun dunyoda bo‘lgani kabi mamlakat jamoatchiligi o‘rtasida ham kashandalikka qarshi kurash muhitini shakllantirish hamda qaror toptirishning tashkiliy va huquqiy sharoitlarini yaratishga qaratilgan.
Munozaralar davomida siyosiy partiyalar fraksiyalari vakillari tomonidan qonun loyihasining qabul qilinishi jamoat joylarida chilim va elektron sigaretalar chekish keng tarqalishining, chilim va elektron sigaretalarning chekilishi natijasida kelib chiqadigan kasalliklarning, shuningdek guruh bo‘lib chekish oqibatida yuqish xavfi bo‘lgan yuqumli kasalliklar tarqalishining oldini olishga xizmat qilishi qayd etib o‘tildi.
“Gazeta.uz” yozishicha, O‘zbekistonda jamoat joylarida tamaki mahsulotlarini (ularga nosvoy ham kiradi) iste’mol qilish 2012-yil aprelidagi qonun bilan taqiqlangan, ammo buning uchun jarima 2015-yil oxiridagina kiritilgan edi. Qonunning ko‘plab qoidalariga haligacha amal qilinmaydi.
Izoh (0)