Navoiy aholisi ularni tovuq sotib olishga majburlashayotganidan shikoyat qildi

Navoiy viloyatida budjet tashkilotlari xodimlarini tovuq sotib olishga majburlashmoqda, deb yozadi “Gazeta.uz” Navoiy shahar aholisiga tayanib. Ularning so‘zlariga ko‘ra, tovuq sotib olish uchun o‘qituvchilar, shifokorlar, bank ishchilari, bog‘cha tarbiyachilari va boshqalar pul topshirmoqda.

“Bizning bo‘limimizga 70 ta tovuq taqsimlab berishdi, bu yerda 50 kishi ishlaydi, — dedi Navoiy tibbiyot birlashmasi xodimasi. — Tovuqlarni 30 ming so‘mdan sotishmoqda. O‘tgan safar 8—10 ming so‘mdan 10 ta tovuq sotishgandi. O‘shanda biz rozi bo‘lgandik, ammo bu yana qaytariladi deb o‘ylamagandik. Pulni oylikdan ushlab qolishmayapti, bankka borib to‘lashni so‘rashyapti”.

Uning aytishicha, yig‘ilishda tibbiyot birlashmasi rahbari tovuqlarni oylikka qarab taqsimlashni buyurgan, ammo har bir xodim kamida bittadan tovuq olishi shartligini aytgan. Ko‘p xonadonli uylarda yashagani tufayli tovuq boqish imkoniyati bo‘lmaganlarga ularni so‘yib yeyishni taklif qilishgan.

Navoiy viloyati hokimligida aholini tovuq bilan ta’minlash kampaniyasi “Har bir oila — tadbirkor” dasturi doirasida o‘tkazilayotganini aytishdi. Tovuqlarni sotishni qishloq joylarda foydalanilmayotgan yer maydonlarini ishga solishga intilish bilan izohlashdi. Hokimlik vakili tovuq sotib olish har bir fuqaroning o‘z ixtiyoriga havola etilishini ta’kidladi.