Samarqand shahar hokimiyati shaharning rus arxitekturasi namunalari joylashgan qismida ko‘p qavatli binolar qurish loyihasidan voz kechdi, deb yozadi Sputnik.
Vaziyatni o‘rganib chiqqan mutaxassislar, shaharning XIX asr oxiri XX asr boshlarida qurilgan qismida ko‘p qavatli binolar qurish, ushbu tarixiy obyektlarning zarar ko‘rishiga va shaharning tarixiy qiyofasi o‘zgarishiga olib kelishi mumkinligini ko‘rsatgan.
18-iyun kuni ertalabdan Pushkin ko‘chasida barcha qurilish ishlari to‘xtatilgan, ixtisoslashgan muassasalarga vaziyatni o‘rganib, ushbu hududning tarixiy siymosini saqlab qoluvchi qurilish rejasi ishlab chiqish topshirilgan.
Xususan, mansabdor shaxslar aytishiga qaraganda, ushbu hududda balandligi uch qavatdan yuqori bo‘lgan (yerto‘la bilan hisoblaganda) binolar qurish taqiqlanadi. Shuningdek, yangi quriladigan binolar hududning 1,5 asr davomida shakllangan umumiy me’moriy qiyofasiga mos bo‘lishi kerak.
Chor Rossiyasi davrida qurilgan binolarning tashqi ko‘rinishi va ichki tuzilishi saqlab qolingan holda, qayta ta’mirlanadi. Ayni damda sayyohlar kam keladigan, shaharning ushbu qismi xorijlik mehmonlar uchun qiziq bo‘lgan maskanga aylantiriladi.
Avvalroq Samarqandda XIX asrda qurilgan 4 ta masjid buzib tashlanishi oqibatida davlat manfaatlariga 13,2 milliard so‘m zarar yetkazilgani haqida xabar berilgan edi.
Izoh (0)