Жиноят ишлари бўйича Мирзо Улуғбек туман суди судьяси: Вояга етмаганлар орасида аксарият ҳолларда ўғрилик, тан жароҳати етказиш, ҳақоратлаш каби жиноятлар кузатилади

Ўтган уч ой мобайнида жиноят ишлари бўйича Мирзо Улуғбек туман суди томонидан вояга етмаганлар орасида бешта жиноий иш кўрилиб, олтита шахс жавобгарликка тортилган. Бу ҳақда жиноят ишлари бўйича Мирзо Улуғбек туман суди судьяси Фаррух Тўрахўжаев «Дарё»га маълум қилди.

Аксарият ҳолларда вояга етмаганлар орасида ўғрилик, тан жароҳати етказиш, ҳақоратлаш, безорилик каби жиноятлар кузатилади. Масалан, «Феруза» маҳалласи худудидаги 205-мактабда ўтказилган сайёр суд мажлисида ўғриликка қўл урган вояга етмаган уч нафар ёш, яъни Мўминов, Саҳобиддинов ва Илҳомбековнинг иши кўриб чиқилди.

Улар Жиноят Кодексининг 169-моддаси 2-қисми «б», «в», «г» бандларида кўрсатилган жиноятларни содир этганликлари аниқланган бўлиб, жиноятлари учун қатъий белгиланган жазони ўташлари керак эди. Бироқ Ёшлар иттифоқининг Мирзо Улуғбек тумани кенгаши кафиллиги ва маҳалла фаоллари кафиллиги сабаб Мўминовга бир йил озодликдан чеклаш, Саҳобиддинов ва Илҳомбековга эса олти ой озодликдан чеклаш жазоси белгиланди.

Ўғриликда айбланган Мавлонхўжаев касб-ҳунар коллежи ўқувчиси. Яхши оиланинг фарзанди, ҳеч қандай муаммоси бўлмай туриб, курсдошининг чўнтагидан уй калитини олиб, унинг уйига ўғриликка тушади. Уйдаги бор пул ва тилла тақинчоқларни олиб чиқиб кетади. У Жиноят кодекси 169 моддаси 2-қисми «г» бандида назарда тутилган жиноятни содир этганликда айбли деб топилиб, унга шу модда билан Жиноят кодексининг 82-моддаси тартибида энг кам ойлик иш ҳақининг 15 баравари миқдорида жарима тайинланди.