Rossiyaning “Nikol-Pak” mas’uliyati cheklangan jamiyati O‘zbekistonning Angren Pack kompaniyasini to‘liq sotib olishga qaror qildi, deb yozadi Spot “Toshkent” Respublika fond birjasi ma’lumotlariga tayanib.
Avvalroq “Nikol-Pak” Angren Pack kompaniyasi aksiyalarining 53 foizini sotib olgan va shu tariqa, Chexiyaning Paper Mill Holding kompaniyasiga tegishli 215 600 aksiyaga ega bo‘lgan edi.
Endi esa “Nikol-Pak” korxonaning qolgan oddiy aksiyalarini ham sotib olish qarorini e’lon qildi. Agar 30 kun ichida aksiyalarni sotish haqida yozma rozilik olsa, Rossiya kompaniyasi ularni sotib olish majburiyatini oladi.
Angren Pack O‘zbekiston qog‘oz sanoatining yetakchi korxonalaridan biri. Kompaniyaning ishlab chiqarish quvvati yiliga 100 ming tonna qog‘oz va 120 million kvadrat metr gofrokartondan iborat.
Korxona xorijiy investitsiyali aksiyadorlik jamiyati bo‘lib, 2011-yilda nazorat paketi Chexiyaning Paper Mill Holding kompaniyasi tomonidan sotib olingandi.
Izoh (0)