Toshkent shahridagi “Xalqlar do‘stligi” saroyida tashkil etilgan “Unutmoq osonmas” xotira dasturi turkumidagi musiqiy kecha adabiyot namoyandalari, kinematografiya, suxandonlik san’ati, mumtoz qo‘shiqchilik va estrada rivoji yo‘lida salmoqli mehnat qilgan san’atkorlar yodiga bag‘ishlandi. Bu haqda O‘zA xabar berdi.
Chorlov musiqasi yangraydi. Sahnaga o‘rnatilgan ulkan ekran orqali namoyish etilayotgan videolavhalarda umrini ma’naviyat, adabiyot, san’atning gullab-yashnashiga bag‘ishlagan insonlarning siymosi gavdalanadi. Milliy adabiyotni O‘zbekiston qahramonlari Erkin Vohidov va Abdulla Oripov ijodisiz tasavvur etish mushkul. Ularning she’rlari kirib bormagan xonadonni topish mushkul.
Mohir rejissyor, san’at arbobi Shuhrat Abbosovning filmlari mamlakat va xorijda ham shuhrat qozongan. O‘zbekiston xalq artisti O‘lmas Alixo‘jayev ijro etgan rollari milliy ruhi, betakrorligi bilan muxlislar qalbdan o‘rin olgan. Taniqli xonandalar Olmaxon Hayitova, Kamoliddin Rahimov, Faxriddin Umarov musiqa san’atimiz yo‘lida samarali mehnat qilgan bo‘lsa, Nasiba Maqsudova, Abdumo‘min O‘tbosarov, Dildora Qayumova singari taniqli suxandonlar ona tilining, so‘zning qadr-qimmatini baland bilgan, kasbiga sadoqatli ijodkorlar edi.
Musiqiy kechada odamiylikni, samimiy va umrboqiy ezgu tuyg‘ularni tarannum etuvchi kuy-qo‘shiqlar ijro etildi.
Izoh (0)