Qashqadaryo viloyatining Chiroqchi tumanida 16-iyun kuni DXX organlari tomonidan dunyoning ko‘plab mamlakatlarida terrorchi tashkilot sifatida tan olingan “O‘zbekiston islom harakati” faoliyatiga aloqadorligi uchun qidiruvda bo‘lgan, 1972- yilda Chiroqchi tumanida tug‘ilgan, 2014-yilda AQSh fuqaroligini olgan Zokir Aliyev qo‘lga olindi. Bu haqda Davlat xavfsizligi xizmati ma’lum qildi, deya xabar beradi O‘zA.
Qo‘lga olish jarayonida Z.Aliyev noqonuniy faoliyatiga iqror ekani to‘g‘risida ko‘rsatma berdi. Xususan, u 2000-yilda “O‘zbekiston islom harakati”ga sodiq bo‘lishga qasamyod qilgan, Afg‘oniston hududida harbiy tayyorgarlikdan o‘tgan hamda mazkur mamlakat hukumat kuchlari va koalitsiya qo‘shinlariga qarshi jangovar harakatlarda ishtirok etgan.
“O‘zbekiston islom harakati”ning boshqa a’zolari bergan ko‘rsatmalarga asosan, diniy-ekstremistik va terroristik faoliyatni amalga oshirgani uchun 2005-yilda DXX tergov bo‘limlari tomonidan Z. Aliyevga nisbatan O‘zbekiston Respublikasi Jinoyat kodeksining bir qator moddalari bo‘yicha jinoiy ish qo‘zg‘atilgandi.
Ayni paytda Z.Aliyevga nisbatan ehtiyot chorasini qo‘llash masalasi ko‘rib chiqilmoqda.
Izoh (0)