Қашқадарё вилоятининг Чироқчи туманида 16 июнь куни ДХХ органлари томонидан дунёнинг кўплаб мамлакатларида террорчи ташкилот сифатида тан олинган «Ўзбекистон ислом ҳаракати» фаолиятига алоқадорлиги учун қидирувда бўлган, 1972- йилда Чироқчи туманида туғилган, 2014 йилда АҚШ фуқаролигини олган Зокир Алиев қўлга олинди. Бу ҳақда Давлат хавфсизлиги хизмати маълум қилди, дея хабар беради ЎзА.
Қўлга олиш жараёнида З.Алиев ноқонуний фаолиятига иқрор экани тўғрисида кўрсатма берди. Хусусан, у 2000 йилда «Ўзбекистон ислом ҳаракати»га содиқ бўлишга қасамёд қилган, Афғонистон ҳудудида ҳарбий тайёргарликдан ўтган ҳамда мазкур мамлакат ҳукумат кучлари ва коалиция қўшинларига қарши жанговар ҳаракатларда иштирок этган.
«Ўзбекистон ислом ҳаракати»нинг бошқа аъзолари берган кўрсатмаларга асосан, диний-экстремистик ва террористик фаолиятни амалга оширгани учун 2005 йилда ДХХ тергов бўлимлари томонидан З.Алиевга нисбатан Ўзбекистон Республикаси Жиноят кодексининг бир қатор моддалари бўйича жиноий иш қўзғатилганди.
Айни пайтда З.Алиевга нисбатан эҳтиёт чорасини қўллаш масаласи кўриб чиқилмоқда.
Изоҳ (0)