Andijonda qotillikka qo‘l urgan 27 yoshli yigit umrbod qamoq jazosiga hukm qilindi (video)

Andijonda dahshatli qotillik sodir etgan yosh yigit umrbod ozodlikdan mahrum qilindi. Bu haqda “Xabar.uz” yozmoqda.

Abduqayumov Azizbek Dilmurodovich 1991-yili Andijon viloyatining Xo‘jaobod tumanida tug‘ilgan.

U oilasi bo‘la turib tumandoshi Feruzaga ko‘ngil qo‘ydi. Birinchi oilasidan hali qonunan ajrashib ulgurmagan Feruza ham Azizbekning taklifiga rozi bo‘lib, u bilan shar’iy nikoh asosida yashay boshladi. Bir yil o‘tib ular o‘g‘il farzand ko‘rdi. Ammo bu ularning munosabatlari uzoqqa bormadi.

O‘tgan yilning 30-dekabrida Feruza Azizbekdan javobini so‘radi. Gap orasida tug‘ilgan farzand uniki emasligini aytib, kurakda turmaydigan haqoratli so‘zlarni yog‘dirdi. Bu esa yigitning jahlini chiqardi.

Azizbek avvaliga Feruza, so‘ngra uning voqeaga guvoh bo‘lgan singlisi Nargizaga og‘ir tan jarohati yetkazdi. Shundan so‘ng o‘gay qizi Gulchiroy hamda beshikda yotgan, hali bir yoshga to‘lmagan Muhammadalini o‘ldirib, ularning barchasini yoqib yubordi.

Azizbek marhumlarga tegishli bo‘lgan 9 milliondan ziyod mulkni ham o‘zlashtirdi.

Jinoyat ishlari bo‘yicha Andijon viloyati sudida unga hukm o‘qildi. Azizbek Abduqayumov Jinoyat kodeksining 97-moddasining tegishli bandlariga muvofiq, umrbod ozodlikdan mahrum etildi.