Tashqi ishlar vazirligi delegatsiyasi 15-iyun kuni Kishinyov shahrida bo‘lib o‘tgan TIV rahbarlari o‘rinbosarlari darajasidagi O‘zbekiston—Moldova siyosiy maslahatlashuvlarida ishtirok etdi. Bu haqda vazirlik matbuot xizmati ma’lum qildi.
Moldova tashqi ishlar va Yevropa bilan integratsiya vazirligi davlat kotibi Tatyana Molchan boshchiligidagi Moldova delegatsiyasi bilan birgalikda ikki tomonlama munosabatlar, jumladan, siyosiy, savdo-iqtisodiy, investitsion va madaniy-gumanitar hamkorlik kabi yo‘nalishlardagi aloqalarning muhim masalalari batafsil muhokama qilindi.
Uchrashuv doirasida so‘nggi yillarda asosan BMT Bosh Assambleyasi kun tartibi bilan cheklanib qolgan O‘zbekiston va Moldova o‘rtasidagi hamkorlikni faollashtirish muhimligi ta’kidlandi.Savdo, qishloq xo‘jaligi, turizm sohasidagi kooperatsiya hamda ikki davlat ta’lim muassasalari o‘rtasidagi akademik almashinuvni kengaytirish uchun ulkan salohiyat mavjudligi qayd etildi.
Uchrashuvda hamkorlikni kengaytirish bo‘yicha O‘zbekiston—Moldova hukumatlararo komissiyasininng navbatdagi majlisini o‘tkazish masalasi ko‘tarildi. Ushbu shakldagi so‘nggi uchrashuv 16-yil oldin Toshkent shahrida o‘tkazilgan edi.
Shu kunning o‘zida Kishinyov shahrida O‘zbekiston va Moldova TIV vakillarining alohida uchrashuvi bo‘lib o‘tdi. Ikki tomonlama aloqalarning shartnomaviy-huquqiy bazasi inventarizatsiya qilindi, yaqin istiqbolda kelishilishi va imzolanishi mumkin bo‘lgan O‘zbekiston—Moldova hujjatlari loyihalari yuzasidan fikr almashildi.
Izoh (0)