Андижонда қотилликка қўл урган 27 ёшли йигит умрбод қамоқ жазосига ҳукм қилинди (видео)

Андижонда даҳшатли қотиллик содир этган ёш йигит умрбод озодликдан маҳрум қилинди. Бу ҳақда «Xabar.uz» ёзмоқда.

Абдуқаюмов Азизбек Дилмуродович 1991 йили Андижон вилоятининг Хўжаобод туманида туғилган.

У оиласи бўла туриб тумандоши Ферузага кўнгил қўйди. Биринчи оиласидан ҳали қонунан ажрашиб улгурмаган Феруза ҳам Азизбекнинг таклифига рози бўлиб, у билан шаръий никоҳ асосида яшай бошлади. Бир йил ўтиб улар ўғил фарзанд кўрди. Аммо бу уларнинг муносабатлари узоққа бормади.

Ўтган йилнинг 30 декабрида Феруза Азизбекдан жавобини сўради. Гап орасида туғилган фарзанд уники эмаслигини айтиб, куракда турмайдиган ҳақоратли сўзларни ёғдирди. Бу эса йигитнинг жаҳлини чиқарди.

Азизбек аввалига Феруза, сўнгра унинг воқеага гувоҳ бўлган синглиси Наргизага оғир тан жароҳати етказди. Шундан сўнг ўгай қизи Гулчирой ҳамда бешикда ётган, ҳали бир ёшга тўлмаган Муҳаммадалини ўлдириб, уларнинг барчасини ёқиб юборди.

Азизбек марҳумларга тегишли бўлган 9 миллиондан зиёд мулкни ҳам ўзлаштирди.

Жиноят ишлари бўйича Андижон вилояти судида унга ҳукм ўқилди. Азизбек Абдуқаюмов Жиноят кодексининг 97-моддасининг тегишли бандларига мувофиқ, умрбод озодликдан маҳрум этилди.