“Nasaf” g‘alabani qo‘ldan chiqardi, “Paxtakor” bazo‘r mag‘lubiyatdan qutulib qoldi, “Lokomotiv” esa iroda ko‘rsatdi

​Bugun, 12-iyun sanasida Pepsi Superligasi 14-tur bahslari o‘z yakuniga yetdi.

Kun taqvimidan 4 uchrashuv o‘rin olgandi.

Ulardan biri Farg‘onada musobaqa autsayderi “Neftchi” hamda peshqadam “Paxtakor” o‘rtasida bo‘lib o‘tdi. O‘yindagi gollar ikkinchi bo‘limning so‘ngiga kelib urildi. Avvaliga mezbonlar vakili Anvar Berdiyev 89-daqiqada hisobni ochgan bo‘lsa, “sherlar”ning braziliyalik legioneri Tiago Bezerra hakam tomonidan qo‘shib berilgan daqiqalarda gol urib jamoasini mag‘lubiyatdan qutqarib qoldi.

Qarshining “Nasaf”i esa Bekobodda “Metallurg” mehmoni bo‘lib, 2 ta gol farqi bilan oldinda borib g‘alabani saqlab qola olmadi. Uchrashuvning 16-daqiqasida Dragan Cheran gol urib, “Nasaf”ni oldinga olib chiqqan bo‘lsa, 35-daqiqaga kelib Bobur Abduxoliqov farqni ikkitaga oshirdi. Ikkinchi bo‘limning 61-daqiqasida Zohid Abdullayev “Metallurg”ning o‘yindagi ilk golini urdi. Uchrashuv yakuniga yetib borayotgan bir vaqtda Zabihillo O‘rinboyev gol urib, uchrashuvning 2:2 hisobida yakunlanishini ta’minladi.

Amaldagi chempion “Lokomotiv” esa Olmaliqning AGMK jamoasini o‘z maydonida qabul qilib, 2:1 hisobida g‘alabaga erishdi. Gollar “Loko”dan Marat Bikmayev va Nivaldo, AGMKdan esa Yovan Jokich nomiga yozildi.

Turning so‘nggi o‘yini Buxoroda mezbon “Buxoro” hamda Toshkentning “Bunyodkor” jamoalari o‘rtasida kechdi. Uchrashuvda 2:2 hisobidagi  jangovar ​durang qayd etildi. “Bunyodkor”ning gollari Shahzodbek Nurmatov, “Buxoro”niki esa Bahodir Nasimov hamda Aziz Ibragimov tomonidan kiritildi.

Superliga klublari Rossiyadagi Jahon Chempionati sabab yozgi ta’tilga chiqib ketdi.