«Насаф» ғалабани қўлдан чиқарди, «Пахтакор» базўр мағлубиятдан қутулиб қолди, «Локомотив» эса ирода кўрсатди

​Бугун, 12 июнь санасида Pepsi Суперлигаси 14-тур баҳслари ўз якунига етди.

Кун тақвимидан 4 учрашув ўрин олганди.

Улардан бири Фарғонада мусобақа аутсайдери «Нефтчи» ҳамда пешқадам «Пахтакор» ўртасида бўлиб ўтди. Ўйиндаги голлар иккинчи бўлимнинг сўнгига келиб урилди. Аввалига мезбонлар вакили Анвар Бердиев 89-дақиқада ҳисобни очган бўлса, «шерлар»нинг бразилиялик легионери Тиаго Безерра ҳакам томонидан қўшиб берилган дақиқаларда гол уриб жамоасини мағлубиятдан қутқариб қолди.

Қаршининг «Насаф»и эса Бекободда «Металлург» меҳмони бўлиб, 2 та гол фарқи билан олдинда бориб ғалабани сақлаб қола олмади. Учрашувнинг 16-дақиқасида Драган Черан гол уриб, «Насаф»ни олдинга олиб чиққан бўлса, 35-дақиқага келиб Бобур Абдухолиқов фарқни иккитага оширди. Иккинчи бўлимнинг 61-дақиқасида Зоҳид Абдуллаев «Металлург»нинг ўйиндаги илк голини урди. Учрашув якунига етиб бораётган бир вақтда Забиҳилло Ўринбоев гол уриб, учрашувнинг 2:2 ҳисобида якунланишини таъминлади.

Амалдаги чемпион «Локомотив» эса Олмалиқнинг АГМК жамоасини ўз майдонида қабул қилиб, 2:1 ҳисобида ғалабага эришди. Голлар «Локо»дан Марат Бикмаев ва Нивалдо, АГМКдан эса Ёван Жокич номига ёзилди.

Турнинг сўнгги ўйини Бухорода мезбон «Бухоро» ҳамда Тошкентнинг «Бунёдкор» жамоалари ўртасида кечди. Учрашувда 2:2 ҳисобидаги  жанговар ​дуранг қайд этилди. «Бунёдкор»нинг голлари Шаҳзодбек Нурматов, «Бухоро»ники эса Баҳодир Насимов ҳамда Азиз Ибрагимов томонидан киритилди.

Суперлига клублари Россиядаги Жаҳон Чемпионати сабаб ёзги таътилга чиқиб кетди.