Tashkent City Xalqaro biznes markazi qurilishini to‘rt yil ichida yakunlash rejalashtirilmoqda, deb yozadi “Gazeta.uz” Tashkent City direksiyasiga tayanib. Bu davr loyihalashtirishdan boshlab obyektlarni foydalanishga topshirishgacha bo‘lgan bosqichlarni o‘z ichiga oladi.
Loyiha ikkita bosqichga ajratilgan — mehmonxona va kongress-xoll, turar joy binolarining bir qismi va bog‘ zonasini birinchi navbatda ikki yarim yil ichida foydalanishga topshirish rejalashtirilmoqda.
Qurilish maydoni yettita lotga bo‘lingan, ularda to‘qqizta investorning 1,3 milliard dollarlik investitsiyalari kiritilishini ko‘zda tutuvchi loyihalarning amalga oshirilishi tasdiqlangan. Tashkent City hududida quyidagilar barpo etiladi:
- yer osti turargohlariga ega “A” sinfidagi turar joy majmualari;
- bolalar bog‘chasi, xalqaro maktab va SPA-markazlar;
- 181 ming kvadrat metr maydonli savdo markazi;
- ko‘p funksiyali bir nechta baland binolar;
- besh yulduzli mehmonxona, kongress-xoll va ko‘rgazma markazi;
- to‘rtta baland ofis binolaridan iborat moliyaviy markaz;
- eski shahar uslubidagi, kam qavatli binolar bilan o‘ralgan piyodalar ko‘chasi.
Tashkent City direksiyasi kongress-xoll qurilishini birlamchi deb belgiladi, u yerda poydevor qo‘yish ishlari bormoqda. Boshqa uchastkalarda aholini boshqa joyga ko‘chirish va mavjud binolarni buzish jarayonlari yakunlanmoqda. Investorlar ajratilgan hududlarda binolarni va infratuzilmani batafsil loyihalashtirishga kirishdi.
Loyihani amalga oshirish uchun Tashkent City direksiyasi ekspertlar jamoasini yig‘di, bular: ARUP (Buyuk Britaniya) — arxitektura konsepsiyasini ishlab chiquvchi, Cushman and Wakefield (AQSh) — tijorat konsepsiyasini ishlab chiquvchi, SF Landscape Architecture (Italiya) — lanshaft konsepsiyasini ishlab chiquvchi, Prime Tower Group (O‘zbekiston) — bosh loyihalovchi, Discover Invest (O‘zbekiston) — bosh pudratchi va boshqalar.
Izoh (0)