Andijon shahar hokimligining majlislar zalida xalq deputatlari shahar kengashi deputatlari, shahardan saylangan viloyat kengashi deputatlari, viloyat ichki ishlar boshqarmasining sohaviy xizmatlari rahbarlari hamda jamoatchilik vakillari ishtirokida yig‘ilish bo‘lib o‘tdi. Bu haqda IIV jamoatchilik va OAV bilan aloqalar boshqarmasi xabar berdi.
Majlisni Andijon shahar hokimi, xalq deputatlari shahar kengashi raisi Dilmurod Rahmatullayev ochib berdi va olib bordi. Kun tartibidagi masala yuzasidan Ichki ishlar vaziri general-mayor Po‘lat Bobojonov so‘zga chiqdi.
Vazir o‘z chiqishida o‘tgan to‘rt oy mobaynida shahardagi mavjud 83 ta mahallaning 37 tasida jinoyat sodir etilganligi, shundan 8 tasida jinoyatlar soni ortganligi, voyaga yetmaganlar tomonidan 8 ta jinoyat sodir etilganligi bu borada keng jamoatchilik bilan tushuntirish-targ‘ibot ishlarini yanada kuchaytirish zarur ekanligini ta’kidladi.
Muqaddam sudlangan shaxslar bilan olib borilgan ishlar talab darajasida tashkil etilmaganligi, ayrim shaxslar tomonidan qayta jinoyat sodir etilishiga yo‘l qo‘yilganligini hamda sodir etilayotgan jinoyatlarni ochish emas, ularning barvaqt oldini olish va fuqarolar ongida jinoyatchilikka qarshi muhit yaratish bugungi kunning talabi ekanligiga e’tibor qaratdi.
Shundan so‘ng kun tartibidagi tashkiliy masala ko‘rib chiqildi. Andijon shahar ichki ishlar boshqarmasi boshlig‘i vazifasini bajaruvchi etib tayinlangan polkovnik Saidkarim Nishonboyev shahar kengashi faollariga tanishtirildi.
Izoh (0)