Suriya prezidenti Bashar Asad RT telekanaliga bergan intervyusida mamlakatning butun hududini, jumladan, ayni vaqtda asosiy qismi turk qo‘shinlari nazoratida bo‘lgan Idlib viloyatini ham hukumat kuchlari tasarrufi ostiga o‘tkazishga va’da berdi, deb xabar qiladi “Kommersant”.
“Biz doim Suriyaning barcha tumanlarini ozod qilishni istaganmiz. Shunday ekan mamlakatning biror-bir qismini qasddan hukumat nazorati ostidan chiqarib yuborish aqlbovar qilmas ish. Barchasi kundek ravshan. Idlib 2015-yilda Turkiyaning qo‘llab-quvvatlovi ostida bo‘lgan terrorchilar, xususan, ‘Jabhat an-Nusra’ tomonidan egallab olingan”, — deydi Asad.
Bashar Asadning so‘zlariga qaraganda, hukumat kuchlari tomonidan egallangan hududlardagi jangarilar mustaqil ravishda Idlibga ketish qarorini qabul qilgan va bunda hukumat kuchlari ularga xalaqit bermagan.
“Biz ularning barchasini bir yoki ikkita tumanga yig‘ishni rejalashtirgandik. Axir bir vaqtning o‘zida o‘nta yoki yuzta yo‘nalishda jang qilgandan ko‘ra, bir yoki ikkita tumanda kurashgan osonroq. Harbiy jihatdan bu samarali. Tanlovni ular amalga oshirgan, biroq harbiy strategiya nuqtai nazaridan bu bizning ham foydamiz uchun edi”, — deydi Suriya prezidenti.
Izoh (0)