2017-yilning 25-avgust sanasida “Daryo.uz” nashrida “Green Card orqali firibgarlik qilgan narpaylik shaxs qo‘lga olindi” mavzusida xabar berilgan edi. Biroq olingan ma’lumotlarga ko‘ra, Samarqand viloyati IIB tomonidan firibgarlikda gumon qilingan Oybek Nahangovning harakatlarida firibgarlik holati aniqlanmagani sabab jinoyat ishi tugatilgan, deb xabar berdi “Kun.uz”.
Xabarda Samarqand viloyati sobiq MXX boshqarmasi va Samarqand viloyat Ichki ishlar boshqarmasi hamkorlikda tadbir uyushtirib, ular tomonidan fuqaro Oybek Nahangov 15 million so‘m pul olayotgan vaqtda qo‘lga olingani va unga nisbatan Jinoyat kodeksining 168-moddasi (firibgarlik) bo‘yicha jinoyat ishi qo‘zg‘atilgani haqida bayon qilingandi.
Oybek Nahangovga nisbatan tergov harakatlari amalga oshirilgan chog‘da uning harakatlarida firibgarlik jinoyati tarkibi aniqlanmagani sababli 2017-yil 18-oktabr kuni jinoyat ishini tugatish haqida qaror qabul qilingan.
Bunga sabab sifatida fuqaro Oybek Nahangov yakka tartibdagi tadbirkor ekanligi, rasman ro‘yxatdan o‘tganligi va Green Card lotereyasi uchun anketa to‘ldirib berish xizmati uchun mijozlar bilan rasman shartnoma imzolaganligi va barcha harakatlarni shu shartnoma asosida olib borgani ko‘rsatilgan.
Ya’ni Oybek Nahangov mijozlari bilan rasman shartnoma tuzib, Green Card lotereyasi uchun anketani to‘ldirish uchun eng kam ish haqining (EKIH) yarim baravari miqdorida to‘lov to‘lashini, agar to‘lovni amalga oshirmasa, unda yana yangi shartnoma tuzib EKIHning 100 baravari miqdorida to‘lov to‘lashini belgilab qo‘ygan. Jizzaxlik fuqaro U.Sh. dastlabki to‘lovni amalga oshirmagani uchun u bilan yana yangi shartnoma imzolangan va bu safar shartnomada unga yutuq chiqqanligi sababli kerakli kodni aytish va keyingi hujjatlarni tayyorlash uchun EKIHning 100 baravar miqdorida to‘lovni amalga oshirishi ko‘rsatilgan.
Tergov jarayonida fuqaro U.Sh. haqiqatdan shartnomaga imzo qo‘yganini, dastlabki to‘lovni amalga oshirmaganini, Oybek Nahangov undan kodni aytish uchun dastlab 15 million so‘m so‘raganini, keyinchalik 12 million so‘mga kelishganini bildirgan.
U.Sh.ning otasi tergov jarayonida haqiqatdan oilasi bilan Green Card lotereyasi uchun rasman shartnoma tuzgan holda anketa to‘ldirishganini, o‘zlariga yutuq chiqmasdan, o‘g‘li U.Sh.ga yutuq chiqqanini, xursandchiligidan xizmat ko‘rsatuvchilarga ikki marta 100 AQSh dollaridan “suyunchi puli” berganini, keyinchalik Oybek Nahangov kodni aytish uchun shartnomada ko‘rsatilgan 15 million so‘m to‘lovni amalga oshirishni so‘raganini, so‘ng buncha pul yo‘qligi sababli o‘g‘li tanishlari orqali huquqni muhofaza qiluvchi organlarga murojaat qilganini ma’lum qilgan.
Samarqand viloyat Ichki ishlar boshqarmasi huzuridagi tergov bo‘limi mazkur holatlarni o‘rganib chiqib, Oybek Nahangovning qilmishida firibgarlik jinoyati tarkibi yo‘qligi sababli Jinoyat-protsessual kodeksi 83-modda 2-qismiga asosan jinoyat ishini tugatish haqida qaror chiqargan.
Izoh (0)