2017 йилнинг 25 август санасида «Daryo.uz» нашрида «Green Card орқали фирибгарлик қилган нарпайлик шахс қўлга олинди» мавзусида хабар берилган эди. Бироқ олинган маълумотларга кўра, Самарқанд вилояти ИИБ томонидан фирибгарликда гумон қилинган Ойбек Наҳанговнинг ҳаракатларида фирибгарлик ҳолати аниқланмагани сабаб жиноят иши тугатилган, деб хабар берди «Kun.uz».
Хабарда Самарқанд вилояти собиқ МХХ бошқармаси ва Самарқанд вилоят Ички ишлар бошқармаси ҳамкорликда тадбир уюштириб, улар томонидан фуқаро Ойбек Наҳангов 15 миллион сўм пул олаётган вақтда қўлга олингани ва унга нисбатан Жиноят кодексининг 168-моддаси (фирибгарлик) бўйича жиноят иши қўзғатилгани ҳақида баён қилинганди.
Ойбек Наҳанговга нисбатан тергов ҳаракатлари амалга оширилган чоғда унинг ҳаракатларида фирибгарлик жинояти таркиби аниқланмагани сабабли 2017 йил 18 октябрь куни жиноят ишини тугатиш ҳақида қарор қабул қилинган.
Бунга сабаб сифатида фуқаро Ойбек Наҳангов якка тартибдаги тадбиркор эканлиги, расман рўйхатдан ўтганлиги ва Green Card лотереяси учун анкета тўлдириб бериш хизмати учун мижозлар билан расман шартнома имзолаганлиги ва барча ҳаракатларни шу шартнома асосида олиб боргани кўрсатилган.
Яъни Ойбек Наҳангов мижозлари билан расман шартнома тузиб, Green Card лотереяси учун анкетани тўлдириш учун энг кам иш ҳақининг (ЭКИҲ) ярим баравари миқдорида тўлов тўлашини, агар тўловни амалга оширмаса, унда яна янги шартнома тузиб ЭКИҲнинг 100 баравари миқдорида тўлов тўлашини белгилаб қўйган. Жиззахлик фуқаро У.Ш. дастлабки тўловни амалга оширмагани учун у билан яна янги шартнома имзоланган ва бу сафар шартномада унга ютуқ чиққанлиги сабабли керакли кодни айтиш ва кейинги ҳужжатларни тайёрлаш учун ЭКИҲнинг 100 баравар миқдорида тўловни амалга ошириши кўрсатилган.
Тергов жараёнида фуқаро У.Ш. ҳақиқатдан шартномага имзо қўйганини, дастлабки тўловни амалга оширмаганини, Ойбек Наҳангов ундан кодни айтиш учун дастлаб 15 миллион сўм сўраганини, кейинчалик 12 миллион сўмга келишганини билдирган.
У.Ш.нинг отаси тергов жараёнида ҳақиқатдан оиласи билан Green Card лотереяси учун расман шартнома тузган ҳолда анкета тўлдиришганини, ўзларига ютуқ чиқмасдан, ўғли У.Ш.га ютуқ чиққанини, хурсандчилигидан хизмат кўрсатувчиларга икки марта 100 АҚШ долларидан «суюнчи пули» берганини, кейинчалик Ойбек Наҳангов кодни айтиш учун шартномада кўрсатилган 15 миллион сўм тўловни амалга оширишни сўраганини, сўнг бунча пул йўқлиги сабабли ўғли танишлари орқали ҳуқуқни муҳофаза қилувчи органларга мурожаат қилганини маълум қилган.
Самарқанд вилоят Ички ишлар бошқармаси ҳузуридаги тергов бўлими мазкур ҳолатларни ўрганиб чиқиб, Ойбек Наҳанговнинг қилмишида фирибгарлик жинояти таркиби йўқлиги сабабли Жиноят-процессуал кодекси 83-модда 2-қисмига асосан жиноят ишини тугатиш ҳақида қарор чиқарган.
Изоҳ (0)