Innovatsion rivojlanish vazirligida AQSh Xalqaro rivojlanish agentligining (USAID) O‘zbekistondagi vakolatxonasi rahbari Garri Robbins bilan uchrashuv bo‘lib o‘tdi. Bu haqda “Daryo”ga vazirlik matbuot xizmati xabar bermoqda.
Janob Robbins suhbatni so‘nggi yillarda O‘zbekistonda bo‘layotgan ijobiy o‘zgarishlarning shiddatini e’tirof etishdan boshlab, “bu o‘zgarishlarni kuzatarkanmiz, qanday qilib shuncha islohotlarga ulgirayotganingizdan hayratdamiz” deya lutf qildi. Shavkat Mirziyoyevning ikki hafta burun AQShga rasmiy tashrifini ikki davlat o‘zaro munosabatlaridagi tarixiy voqea ekanini aytdi. Prezidentning AQSh Kongressi, Mudofaa vazirligi va Davlat departamenti hamda Jahon bankida o‘tkazgan ikki tomonlama uchrashuvlariga yuqori baho berdi.
Innovatsiya vaziri Ibrohim Abdurahmonov olim va ilmiy-tadqiqot institutining rahbari sifatida USAID bilan hamkorlik tajribasiga ega ekani, o‘zi ham AQSh universitetlaridan birida ta’lim olganini aytib, O‘zbekistonda AQShning agrar universitetlaridan birini ochish masalasini ijobiy hal etish bugungi kun talabi ekanini ta’kidladi. Shuningdek, qishloq xo‘jaligiga zamonaviy o‘g‘itlash texnologiyalari, genomikaga doir yangiliklar, GPS uskunalari, kompyuter orqali boshqariladigan tizimlarni olib kirish masalalari muhokama qilindi.
Vazir O‘zbekistonda paxta urug‘chiligida erishilgan yutuqlar haqida gapirarkan, mamlakatda yangi innovatsion texnologiya asosida yaratilgan yangi g‘o‘zaning paxta tolasi sifati jihatdan jahonda yetakchi ekanini, bu navlardan yetishtirilgan paxtaning tolasi uzun va ingichkaligi bilan ajratib turishi, dunyoning qator mamlakatlari, jumladan, AQShda ham bu texnologiyaga qiziqish juda katta bo‘layotganini aytdi. O‘zbekiston olimlari, ixtirochilarining ilg‘or g‘oyalari, yaratgan texnologiyalarini chet daavlatlargaa eksport qilish zarurligini ta’kidladi.
Muzokaralarning keyingi qismi iqtisodiy soha borasida bo‘ldi. AQShda ta’lim olib, qariyb 20 yil davomida AQSh, Buyuk Britaniya, Rossiya davlatlarida moliya sohasida yuqori lavozimlarni egallab kelgan Innovatsiya vazirining o‘rinbosari Otabek Nazirov bank tizimini tubdan o‘zgartirmay turib mamlakat iqtisodini yuqoriga ko‘tarish mumkin emasligi, bank sohasini rivojlantirish uchun esa horijdan sinalgan tajribalarni O‘zbekistonda tatbiq etish maqsadga muvofiq ekanini ta’kidladi. U AQShning nufuzli banklarini O‘zbekistonda filiallarini ochish masalasida janob Robbinsga murojaat qilib, bu masalani tez sur’atlarda hal qilinishi uchun tomonlar birgalikda qadamlar tashlashlari lozimligini aytdi.
Garri Robbins o‘z navbatida soliq sohasida ro‘y berishi kutilayotgan islohotlar O‘zbekiston iqtisodiyotining barqaror o‘sishiga turtki bo‘lishi, 15 yil davomida iqtisodiy ko‘rsatkichlarning pastga tushishidan keyin oxirgi ikki-uch yilda yuqoriga o‘sish bo‘layotganidan xursandligini aytib, USAID O‘zbekiston bilan hamkorlikka shay ekaniga alohida urg‘u berdi.
So‘ng tomonlar atrof-muhit muhofazasi sohasiga to‘xtaldi. O‘zbekiston Orol bo‘yi mamlakatlaridan biri bo‘lgani uchun uning ekologik ahvoli og‘ir ekani, qurg‘oq yerlarni obodlashtirish, qurib qolgan o‘zanlarni to‘ldirish kabi muammolarni hal qilish uchun shu sohadagi dunyoning eng zo‘r mutaxassislarini jalb qilish zaruriyati haqida gapirildi. Qurg‘oq yerlarda ish tajribasiga ega bo‘lgan muhandislarni O‘zbekistonga taklif qilish, maxsus o‘quv mashg‘ulotlari o‘tkazish imkoniyatlari muhokama qilindi.
Uchrashuv so‘ngida vazir mehmonga mamlakatda yetishtirilgan paxta tolasidan O‘zbekistonda ishlab chiqarilgan yuqori sifatli mahsulot — oppoq futbolka hadya qildi. Tomonlar o‘zaro hamkorlikka umidlari katta ekanini yana bir bor ta’kidlab, keyingi muzokaralargacha xayrlashdi.
Izoh (0)