MDHga a’zo davlatlar xavfsizlik organlari va razvedka xizmatlari rahbarlari Sankt-Peterburgda to‘plandi

MDHga a’zo davlatlarning xavfsizlik organlari va razvedka xizmatlari rahbarlari Sankt-Peterburgda o‘tkazilgan majlisda xalqaro terrorizm va diniy ekstremizmga qarshi hamkorlikdagi harakatlarni faollashtirishga kelishib oldi. Bu haqda Rossiya Tashqi razvedka xizmati matbuot xizmati ma’lum qildi, deya xabar beradi Sputnik.

“Majlis yakuni bo‘yicha memorandumda tomonlarning xalqaro terrorizm va diniy ekstremizmga qarshi kurashda muvofiqlashtirilgan harakatlarni faollashtirishga intilish, shuningdek, razvedka ma’lumotlari bilan o‘zaro almashish, ichki va tashqi tahdidlarni samarali bartaraf etish maqsadida milliy maxsus xizmatlar bilan hamkorlik shakllari va yo‘nalishlarini kengaytirish qayd etilgan”, — deyiladi xabarda.

Majlis ishida O‘zbekiston, Ozarbayjon, Armaniston, Belarus, Qozog‘iston, Qirg‘iziston, Rossiya va Tojikiston maxsus xizmatlari va razvedka xizmatlari rahbarlari ishtirok etdi.

Majlis Rossiya prezidenti Vladimir Putinning forum ishtirokchilariga yo‘llagan qutlov so‘zidan boshlandi. Rossiya tashqi razvedka xizmati direktori Sergey Narishkin navbatdagi muddatga ushbu doimiy amalda bo‘luvchi forumning raisligini egalladi.