МДҲга аъзо давлатларнинг хавфсизлик органлари ва разведка хизматлари раҳбарлари Санкт-Петербургда ўтказилган мажлисда халқаро терроризм ва диний экстремизмга қарши ҳамкорликдаги ҳаракатларни фаоллаштиришга келишиб олди. Бу ҳақда Россия Ташқи разведка хизмати матбуот хизмати маълум қилди, дея хабар беради Sputnik.
«Мажлис якуни бўйича меморандумда томонларнинг халқаро терроризм ва диний экстремизмга қарши курашда мувофиқлаштирилган ҳаракатларни фаоллаштиришга интилиш, шунингдек, разведка маълумотлари билан ўзаро алмашиш, ички ва ташқи таҳдидларни самарали бартараф этиш мақсадида миллий махсус хизматлар билан ҳамкорлик шакллари ва йўналишларини кенгайтириш қайд этилган», — дейилади хабарда.
Мажлис ишида Ўзбекистон, Озарбайжон, Арманистон, Беларусь, Қозоғистон, Қирғизистон, Россия ва Тожикистон махсус хизматлари ва разведка хизматлари раҳбарлари иштирок этди.
Мажлис Россия президенти Владимир Путиннинг форум иштирокчиларига йўллаган қутлов сўзидан бошланди. Россия ташқи разведка хизмати директори Сергей Наришкин навбатдаги муддатга ушбу доимий амалда бўлувчи форумнинг раислигини эгаллади.
Изоҳ (0)