Jurnalistlarni qayta tayyorlash markazi Yevropada xavfsizlik va hamkorlik tashkilotining O‘zbekistondagi loyihalari kordinatori idorasi ko‘magida “Terrorizmga qarshi kurashda ommaviy axborot vositalarining roli” deb nomlangan yangi loyiha boshladi. Bu haqda “Daryo” muxbiri Azizbek Abduvaliyev xabar bermoqda.
Loyiha doirasida jurnalistlarning terrorizm va ekstremizm mavzusini yoritishdagi malakasini oshirishga qaratilgan to‘rtta trening o‘tkazilishi ko‘zda tutilgan. Ulardan birinchisi Toshkent shahridagi “Poytaxt” biznes-markazida bo‘lib o‘tdi. Tadbirga markazda va viloyatlarda xizmat qilayotgan 22 nafar jurnalist jamlandi.
Ushbu keng qamrovli loyiha quyidagi yo‘nalishlarni o‘z ichiga olgan:
Poytaxt va mintaqaviy jurnalistlarning ekstremizm va terrorizm mavzuini yoritishdagi salohiyatini oshirish;
Yoshlar auditoriyasini ko‘proq qamrab olish uchun jurnalistlar va davlat tuzilmalari axborot xizmatlarining ilg‘or multimedia texnologiyalaridan foydalanish ko‘nikmalarini rivojlantirish;
OAV yodamida ma’lum tahdidlar, radikallashish va ekstremizmni har qanday ko‘rinishiga nisbatan fuqarolarning jamoatchilik nazoratini kuchaytirish;
Huquqni muhofazalash organlari va ommaviy axborot vositalarining o‘zaro hamkorlik va ijtimoiy sherikchiligini mustahkamlash.
Ilk treningda dastlab huquq-tartibot idoralari xodimlari O‘zbekistonda terrorizm va ekstremizmga qarshi kurash masalalari bo‘yicha qonunchilik bazasi haqida tushuncha berdi. So‘ng mavzu bo‘yicha lavha — xatosini anglab, mamlakatga qaytib kelgan va kechirilgan yigitning taqdiriga bag‘ishlangan hujjatli film namoyish etildi. Filmning yutuq va kamchiliklari tahlil qilindi.
Loyihada ko‘tarilayotgan masalalar bo‘yicha katta tajribaga ega jurnalist, “Novosti Uzbekistana” internet-nashri rahbari Viktor Mixaylov hamkasblarga mavzuning o‘ziga xos tomonlari, uni yoritishda e’tibor qaratish lozim bo‘lgan jihatlar haqida hikoya qildi.
Jurnalistlarni qayta tayyorlash markazi trenerlari Beruniy Alimov va Nozima Toshpo‘latova interaktiv o‘yinlar, testlar, so‘rovnomalar, taqdimotlar yordamida jurnalistlarga bu borada o‘z ustida ko‘proq ishlash, yo‘l qo‘yayotgan kamchiliklarini o‘nglashni o‘rgatdi.
—Mazkur loyiha terrorizm va ekstremizm mavzusini yoritishda tayyorlanayotgan materiallarga professional tarzda yondashishga undaydi, —deydi “Markaziy Farg‘ona” gazetasi muharriri Azimjon Xudoyqulov. — Shu yo‘lga bilib-bilmay kirib qolganlardan intervyu olish, huquq-tartibot idoralaridan ma’lumot to‘plash, yig‘ilgan manbalardan unumli foydalanishdan saboq beradi.
Izoh (0)