Журналистларни қайта тайёрлаш маркази Европада хавфсизлик ва ҳамкорлик ташкилотининг Ўзбекистондаги лойиҳалари кординатори идораси кўмагида «Терроризмга қарши курашда оммавий ахборот воситаларининг роли» деб номланган янги лойиҳа бошлади. Бу ҳақда «Дарё» мухбири Азизбек Абдувалиев хабар бермоқда.
Лойиҳа доирасида журналистларнинг терроризм ва экстремизм мавзусини ёритишдаги малакасини оширишга қаратилган тўртта тренинг ўтказилиши кўзда тутилган. Улардан биринчиси Тошкент шаҳридаги «Пойтахт» бизнес-марказида бўлиб ўтди. Тадбирга марказда ва вилоятларда хизмат қилаётган 22 нафар журналист жамланди.
Ушбу кенг қамровли лойиҳа қуйидаги йўналишларни ўз ичига олган:
Пойтахт ва минтақавий журналистларнинг экстремизм ва терроризм мавзуини ёритишдаги салоҳиятини ошириш;
Ёшлар аудиториясини кўпроқ қамраб олиш учун журналистлар ва давлат тузилмалари ахборот хизматларининг илғор мультимедиа технологияларидан фойдаланиш кўникмаларини ривожлантириш;
ОАВ ёдамида маълум таҳдидлар, радикаллашиш ва экстремизмни ҳар қандай кўринишига нисбатан фуқароларнинг жамоатчилик назоратини кучайтириш;
Ҳуқуқни муҳофазалаш органлари ва оммавий ахборот воситаларининг ўзаро ҳамкорлик ва ижтимоий шерикчилигини мустаҳкамлаш.
Илк тренингда дастлаб ҳуқуқ-тартибот идоралари ходимлари Ўзбекистонда терроризм ва экстремизмга қарши кураш масалалари бўйича қонунчилик базаси ҳақида тушунча берди. Сўнг мавзу бўйича лавҳа — хатосини англаб, мамлакатга қайтиб келган ва кечирилган йигитнинг тақдирига бағишланган ҳужжатли фильм намойиш этилди. Фильмнинг ютуқ ва камчиликлари таҳлил қилинди.
Лойиҳада кўтарилаётган масалалар бўйича катта тажрибага эга журналист, «Новости Узбекистана» интернет-нашри раҳбари Виктор Михайлов ҳамкасбларга мавзунинг ўзига хос томонлари, уни ёритишда эътибор қаратиш лозим бўлган жиҳатлар ҳақида ҳикоя қилди.
Журналистларни қайта тайёрлаш маркази тренерлари Беруний Алимов ва Нозима Тошпўлатова интерактив ўйинлар, тестлар, сўровномалар, тақдимотлар ёрдамида журналистларга бу борада ўз устида кўпроқ ишлаш, йўл қўяётган камчиликларини ўнглашни ўргатди.
—Мазкур лойиҳа терроризм ва экстремизм мавзусини ёритишда тайёрланаётган материалларга профессионал тарзда ёндашишга ундайди, —дейди «Марказий Фарғона» газетаси муҳаррири Азимжон Худойқулов. — Шу йўлга билиб-билмай кириб қолганлардан интервью олиш, ҳуқуқ-тартибот идораларидан маълумот тўплаш, йиғилган манбалардан унумли фойдаланишдан сабоқ беради.
Изоҳ (0)