Yaqin kunlarda Davlat bojxona xizmati organlari o‘z bayrog‘i va taniqlilik belgisiga ega bo‘ladi. Bu haqda Sputnik xabar berdi.
Ushbu ramzlar namunalari Davlat bojxona qo‘mitasi tomonidan normativ-huquqiy hujjatlar portaliga joylashtirilgan.
Davlat bojxona xizmati organlarining bayrog‘i to‘q yashil rangli to‘rtburchak shakldagi matodan iborat bo‘lib, ushbu rang farovonlik va barqarorlik ramzi hisoblanadi. Uning markazidan maxsus taniqlilik belgisi — chetlari to‘q yashil rangli halqa bandli kumush doira ichida joylashgan.
Doira markazida uchi pastga yo‘nalgan, yuqori burchaklari qirqilgan qalqon joylashgan bo‘lib, u O‘zbekiston iqtisodiy manfaatlarni himoya qilish va xavfsizligini ta’minlashni anglatadi.
Qalqon markazidan davlat gerbi joy olgan, qalqon chetidan barcha tomondan quyosh nurlarini ifodaluvchi to‘g‘ri chiziqlar tortilgan. Qalqon ortida ikki ilon chirmashgan ikkita qanotli belgi o‘rin olgan (Merkuriy belgisi) bo‘lib, ular diagonal bo‘yicha uchini pastga qaratib turibdi.
Merkuriy belgisi tijorat, mo‘l-ko‘lchilik, aql-zakovatni, fidoyilik va mehnatsevarlikni, shuningdek, nizolarni tinch yo‘l bilan hal qilishni anglatadi. Markazdagi qalqonning orqasida milliy bayroq yon tomonga silkingan holda simmetrik tasvirlangan.
Eslatib o‘tamiz, O‘zbekistonda 2018-yil 1-iyuldan boshlab butunlay xalqaro normalar va standartlarga asoslangan bojxona nazoratining mutlaqo yangi tizimi ishga tushadi.
Izoh (0)