22—27-aprel kunlari Xitoy poytaxti Pekin shahrida bo‘lib o‘tgan “Mirniy rog” beshinchi harbiy orkestrlar xalqaro festivalida ishtirok etgan O‘zbekiston Mudofaa vazirligi markaziy harbiy orkestri festival ishtirokchilari o‘rtasida eng yaxshi deya e’tirof etildi. Bu haqda vazirlik matbuot xizmati xabar berdi.
Xalqaro festivalda O‘zbekiston Mudofaa vazirligidan 50 nafar ijodkorlar (40 nafardan iborat harbiy orkestr jamoasi hamda 10 nafar Qurolli Kuchlar Markaziy ashula va raqs ansambli ijodiy va balet guruhi a’zolari) O‘zbekistonda xizmat ko‘rsatgan madaniyat xodimi, “Do‘stlik” ordeni sohibi, nafaqadagi polkovnik Pavel Makarov rahbarligi ostida o‘z repertuarlari bilan 24-aprel kuni ishtirok etdi.
Festival dasturida O‘zbekiston harbiy san’atkorlarining repertuaridan “Buyuk ipak yo‘li” marshi, “Salamanka” va “Sorrentoga qayt” musiqali kompozitsiyalar, mashhur jaz asari “Sing-sing”, Xitoyda mashhur bo‘lgan estrada asari “Qahramon” hamda balet guruhi ishtirokida umumxalq sevgan milliy asar “Oq lolalar” va “Lazgi” o‘rin olgan edi.
Izoh (0)