Tehronda O‘zbekiston va Eron o‘rtasidagi savdo-iqtisodiy va ilmiy-texnikaviy hamkorlik bo‘yicha hukumatlararo komissiyaning 12-majlisi bo‘lib o‘tdi. Bu haqda Tashqi savdo vazirligi axborot xizmati xabar berdi.
Shuningdek, O‘zbekiston delegatsiyasining Eronga tashrifi doirasida “O‘zsanoatexport” AJ tomonidan O‘zbekiston-Eron savdo uyi ochildi va har ikki tomonning rasmiy shaxslari va tadbirkorlari ishtirokida biznes-forum o‘tkazildi. Forum natijasida to‘qimachilik, dukkakli mahsulotlar va quritilgan meva-sabzavotlarni yetkazib berish bo‘yicha eksport shartnomalari imzolandi.
Tehronda bo‘lib o‘tgan yig‘ilish doirasida bir qator masalalar, jumladan, cheklangan tovar pozitsiyalarini imtiyozli bojxona bilan ta’minlaydigan ikki tomonlama savdo bitimining loyihasi muhokama qilindi. Tomonlar hujjat loyihasiga qo‘shiladigan mahsulotlar ro‘yxatini bir oy ichida tayyorlash va o‘zaro almashish, shuningdek, o‘zaro kelishilgan muddatda Toshkentda navbatdagi muzokaralarni tashkil etishga kelishib oldi.
Tomonlar ikki mamlakatning kichik va o‘rta biznes subyektlari o‘rtasida yaqin hamkorlik aloqalarini o‘rnatish, moliyaviy, huquqiy va boshqa masalalarni hal qilishda yordam beradigan savdo-sanoat palatalari ishtirokidagi o‘zbek-eron biznes kengashini ta’sis etishga kelishib oldi.
O‘zbekiston Davlat bojxona qo‘mitasi va Eron bojxona boshqarmasi o‘rtasida elektron axborot almashinuvini rivojlantirishga ko‘maklashuvchi memorandum imzolanishiga dastlabki qadam qo‘yildi. Undan ko‘zda tutilgan maqsad o‘zaro savdo-sotiqni rivojlantirish, eksport-import operatsiyalarini amalga oshirish jarayonida bojxona jarayonlarini soddalashtirishdan iborat.
“O‘zbekiston—Eron munosabatlarining asosiy yo‘nalishlaridan biri transport sohasidagi hamkorlikdir. Bizning vazifamiz — ikki mamlakatning eksport tuzilmalarini hisobga olgan holda mavjud tranzit tariflarini eronlik sheriklar bilan optimallashtirish. Bu yuqori qo‘shimcha qiymatga ega mahsulotlarning ham raqobatbardoshligini oshiradi”, — deydi Tashqi savdo vaziri Jamshid Xo‘jayev.
Shuningdek, Eronga tashrif chog‘ida “O‘zbekiston-Turkmaniston-Eron-Ummon”, “Xitoy-Qozog‘iston-O‘zbekiston-Turkmaniston-Eron” va Transafg‘on yo‘lagi orqali transport koridorining ishga tushirilishi masalalari ko‘rib chiqildi.
Eron tomoni “Mafsir-Sharif-Hirot” temir yo‘lining davomi bo‘luvchi “Xaf-Hirot” temir yo‘lining qurilishini yakunlash uchun barcha sa’y-harakatlarni amalga oshirishi haqida xabar berdi. Bu mintaqadagi davlatlar o‘rtasida mahsulotlar yetkazib berish narxi va muddati qisqarishi natijasida yuk tashish hajmining o‘sishiga olib keladi.
Shuningdek, Eron tomoni O‘zbekistonning Hirotda g‘ildiraklar juftligini almashtirish uchun stansiya qurish bo‘yicha takliflarini o‘rganishga tayyorligini bildirdi.
Izoh (0)