Sharofat Aliyeva oldin jinoyat ishlari bo‘yicha Buxoro shahar, Pastdarg‘om, Tayloq, Shahrisabz, Qiziltepa, Dehqonobod va Koson tuman sudlarining hukmi bilan sudlangandi. Bu haqda UzNews xabar bermoqda.
Jinoyat kodeksining turli moddalari bilan bir necha bor sudlanganiga qaramay Qashqadaryo viloyatining Shahrisabz shahridan bo‘lgan Sharofat Aliyeva jinoiy sherigi Guljahon G‘aniyeva bilan birgalikda Yangiyo‘l tumanidagi fuqaroning mulkini qasddan o‘zlashtirish maqsadida uning ishonchiga kirdi. Sovchilikni bahona qilib, xonadon sohiblariga qizlarini baxtini ochishini aytib, uydagi barcha tilla taqinchoqlarni o‘zlashtirdi.
Qizining baxti bog‘langanligi haqidagi taxminlari to‘g‘ri chiqqanligini bilgan ona “folbin sovchi”larning hamma topshirig‘ini so‘zsiz bajardi: birpasda nina, oq paxta, oq ip, qora sellofan, 7 dona shag‘al tosh va 7 dona tilla buyumlar muhayyo qilindi. Zamira opa qizining qarshiligiga qaramay, o‘zining, erining va hatto kelinining ham tilla buyumlarini yig‘ib keldi.
“Sovchi” ularga birma-bir qon surdi, irim-sirimini qilib, sellofanga o‘rab, 3 soatgacha yechmaslik sharti bilan beliga bog‘lab qo‘ydi.
Zamira opa shunday xursand ediki, hatto sovchilarning xatti-harakatidan hayron bo‘layotgan qizi Salimaning savollariga ham hammasini uch kundan keyin bilasan, deb qo‘ya qoldi.
Bu holatga shubha bilan qaragan xonadon egalari shubhalari o‘rinli ekanligini anglab, Yangiyo‘l tuman ichki ishlar bo‘limi xodimlarini yordamga chaqirdi.
Guljahon G‘aniyeva Surxondaryo viloyatining Uzun tumanida tug‘ilib o‘sgan. 5 nafar farzandning onasi bo‘lsa ham qaynopasidan “o‘rnak” olganmi, har holda jinoyat ishlari bo‘yicha Guliston shahar va Dehqonobod tuman sudlari tomonidan sudlanib, tegishli jazoga hukm qilingandi.
Sharofat Aliyeva xavfli retsidivist bo‘la turib, sherigi Guljahon G‘aniyeva bilan oldindan til biriktirib, umumiy bahosi 4 million so‘mlik turli xildagi 7 dona tilla buyumlarni qo‘lga kiritib, jinoyat ustida daliliy ashyolar bilan qo‘lga olingan. Firibgar “sovchilar”ga munosib jazo tayinlandi.
Izoh (0)