Теҳронда Ўзбекистон ва Эрон ўртасидаги савдо-иқтисодий ва илмий-техникавий ҳамкорлик бўйича ҳукуматлараро комиссиянинг 12-мажлиси бўлиб ўтди. Бу ҳақда Ташқи савдо вазирлиги ахборот хизмати хабар берди.
Шунингдек, Ўзбекистон делегациясининг Эронга ташрифи доирасида «Ўзсаноатехпорт» АЖ томонидан Ўзбекистон-Эрон савдо уйи очилди ва ҳар икки томоннинг расмий шахслари ва тадбиркорлари иштирокида бизнес-форум ўтказилди. Форум натижасида тўқимачилик, дуккакли маҳсулотлар ва қуритилган мева-сабзавотларни етказиб бериш бўйича экспорт шартномалари имзоланди.
Теҳронда бўлиб ўтган йиғилиш доирасида бир қатор масалалар, жумладан, чекланган товар позицияларини имтиёзли божхона билан таъминлайдиган икки томонлама савдо битимининг лойиҳаси муҳокама қилинди. Томонлар ҳужжат лойиҳасига қўшиладиган маҳсулотлар рўйхатини бир ой ичида тайёрлаш ва ўзаро алмашиш, шунингдек, ўзаро келишилган муддатда Тошкентда навбатдаги музокараларни ташкил этишга келишиб олди.
Томонлар икки мамлакатнинг кичик ва ўрта бизнес субъектлари ўртасида яқин ҳамкорлик алоқаларини ўрнатиш, молиявий, ҳуқуқий ва бошқа масалаларни ҳал қилишда ёрдам берадиган савдо-саноат палаталари иштирокидаги ўзбек-эрон бизнес кенгашини таъсис этишга келишиб олди.
Ўзбекистон Давлат божхона қўмитаси ва Эрон божхона бошқармаси ўртасида электрон ахборот алмашинувини ривожлантиришга кўмаклашувчи меморандум имзоланишига дастлабки қадам қўйилди. Ундан кўзда тутилган мақсад ўзаро савдо-сотиқни ривожлантириш, экспорт-импорт операцияларини амалга ошириш жараёнида божхона жараёнларини соддалаштиришдан иборат.
«Ўзбекистон—Эрон муносабатларининг асосий йўналишларидан бири транспорт соҳасидаги ҳамкорликдир. Бизнинг вазифамиз — икки мамлакатнинг экспорт тузилмаларини ҳисобга олган ҳолда мавжуд транзит тарифларини эронлик шериклар билан оптималлаштириш. Бу юқори қўшимча қийматга эга маҳсулотларнинг ҳам рақобатбардошлигини оширади», — дейди Ташқи савдо вазири Жамшид Хўжаев.
Шунингдек, Эронга ташриф чоғида «Ўзбекистон-Туркманистон-Эрон-Уммон», «Хитой-Қозоғистон-Ўзбекистон-Туркманистон-Эрон» ва Трансафғон йўлаги орқали транспорт коридорининг ишга туширилиши масалалари кўриб чиқилди.
Эрон томони «Мафсир-Шариф-Ҳирот» темир йўлининг давоми бўлувчи «Хаф-Ҳирот» темир йўлининг қурилишини якунлаш учун барча саъй-ҳаракатларни амалга ошириши ҳақида хабар берди. Бу минтақадаги давлатлар ўртасида маҳсулотлар етказиб бериш нархи ва муддати қисқариши натижасида юк ташиш ҳажмининг ўсишига олиб келади.
Шунингдек, Эрон томони Ўзбекистоннинг Ҳиротда ғилдираклар жуфтлигини алмаштириш учун станция қуриш бўйича таклифларини ўрганишга тайёрлигини билдирди.
Изоҳ (0)