Toshkentning “Minor” masjidida ketma-ket ikki juma namozida — 23-mart va 30-mart kunlari telefon o‘g‘irlagan shaxs qo‘lga olindi. Bu haqda “Toshkent” telekanalining “Poytaxt-vaziyat” ko‘rsatuvida ma’lum qilindi.
Gumonlanuvchi qilgan ishidan pushaymonligini, gunoh ish qilib qo‘yganini tan olarkan, jumladan, shunday dedi: “Men ham bir katta telefon ko‘tarib yuray degandim-da”.
“Poytaxt-vaziyat”ning aniqlik kiritishicha, hozirda gumonlanuvchiga nisbatan jinoyat ishi qo‘zg‘atilgan, tergov harakatlari olib borilmoqda.
Avvalroq “Minor” masjidi tahoratxonasida qoldirilgan kiyimlardan bir million so‘mdan ko‘proq pul o‘g‘irlagan shaxs 8 yilga ozodlikdan mahrum etilgani ma’lum bo‘lgan edi.
Bundan tashqari, bir muddat avval Toshkentdagi “Xoja Ahror Valiy” masjidida ham telefon o‘g‘irlash holati yuz bergani, biroq jabrlanuvchi hozircha huquq-tartibot organlariga murojaat qilmay, gumonlanuvchiga imkon berishga qaror qilgani xabar qilingan edi.
Izoh (0)