Тошкентнинг «Минор» масжидида кетма-кет икки жума намозида — 23 март ва 30 март кунлари телефон ўғирлаган шахс қўлга олинди. Бу ҳақда «Тошкент» телеканалининг «Пойтахт-вазият» кўрсатувида маълум қилинди.
Гумонланувчи қилган ишидан пушаймонлигини, гуноҳ иш қилиб қўйганини тан оларкан, жумладан, шундай деди: «Мен ҳам бир катта телефон кўтариб юрай дегандим-да».
«Пойтахт-вазият»нинг аниқлик киритишича, ҳозирда гумонланувчига нисбатан жиноят иши қўзғатилган, тергов ҳаракатлари олиб борилмоқда.
Аввалроқ «Минор» масжиди таҳоратхонасида қолдирилган кийимлардан бир миллион сўмдан кўпроқ пул ўғирлаган шахс 8 йилга озодликдан маҳрум этилгани маълум бўлган эди.
Бундан ташқари, бир муддат аввал Тошкентдаги «Хожа Аҳрор Валий» масжидида ҳам телефон ўғирлаш ҳолати юз бергани, бироқ жабрланувчи ҳозирча ҳуқуқ-тартибот органларига мурожаат қилмай, гумонланувчига имкон беришга қарор қилгани хабар қилинган эди.
Изоҳ (0)