Buxorodan bir emas, ikki otaxon O‘zbekiston bo‘ylab sayohatga chiqqani ma’lum bo‘ldi

7-aprel kuni Buxoro viloyati, Peshku tumanida istiqomat qiluvchi, 70 yoshni qarshi olgan otaxon Qudratov Muhammad Qulnazarovich O‘zbekiston bo‘ylab sayohat qilish maqsadida velosiped orqali o‘z sayohatini boshlagani haqida xabar berilgan edi. Sayohat davomida ularning soni 2 ta ekanligi aniqlandi. Bu haqda “Daryo”ga turizmni rivojlantirish davlat qo‘mitasi matbuot xizmati ma’lum qildi.

Aslonov Omon ota ham xuddi M. Qudratov singari Buxoro – Samarqand – Toshkent – Namangan – Farg‘ona – Andijon – Termiz – Qarshi – Buxoro yo‘nalishi bo‘yicha sayohatni amalga oshirishni rejalashtirgan.

Hozirda sayohatchi otaxonlar Toshkent shahriga yetib kelishdi va Turizmni rivojlantirish davlat qo‘mitasi binosiga tashrif buyurishib, qo‘mita xodimlari bilan o‘zlarining taassurotlarini o‘rtoqlashdi.

Hozirgi kunga qadar otaxonlar Buxoro – Navoiy – Samarqand – Toshkent yo‘nalishi bo‘ylab velosipedda sayohatni amalga oshirgan va mazkur hududlardagi tarixiy obidalar va diqqatga sazovor joylarni ziyorat etgan.

Eslatib o‘tamiz, Muhammad ota 70 yoshni qarshilagan bo‘lsa, Omon ota 75 yoshga to‘lgan.