Qozog‘istonda marshrutka haydovchisi yirik summadagi pullar bo‘lgan hamyonni egasiga qaytardi

Qozog‘istonning Semey shahrida marshrutka haydovchisi unutib qoldirilgan hamyonni egasiga qaytardi, deb yozadi “Nur.kz”.

Semey shahrida yashovchi Saule fitnes klubdan chiqib, uyga qaytish uchun 36-raqamli marshrutkaga chiqqan. Yo‘l haqi uchun to‘lagan ayol hamyonini tizzasidagi paket ustiga qo‘ygan. Marshrutkadan chiqayotib esa, hamyonni tushurib qoldirgan, uni yo‘qotganligini ertasi kuni ertalab payqagan.

“Tongda uni topa olmadim. Hamyonda 30 ming tenge naqd pul, bundan tashqari, shaxsni tasdiqlovchi guvohnoma, tashrif qog‘ozlari, kvitansiya va ichida 400 ming tenge bo‘lgan kartochka bor edi”, — deya hikoya qiladi Saule.

Shu kuni kechqurun ayolga fitnes klub murabbiyi qo‘ng‘iroq qilib, uni marshrutka haydovchisi qidirayotganligini ma’lum qilgan. Haydovchi fitnes-klub manzilini hamyondagi abonement bo‘yicha topgan va hamyonni qaytarganligi uchun pul mukofoti olishdan bosh tortgan.