O‘zbekistonda 2010-yilda 17,8 ming nikoh bekor qilingan bo‘lsa, 2017-yilda bu raqam 31,9 mingni tashkil etdi. Ya’ni, shu muddat mobaynida oilalar buzilishi 1,7 martaga ortdi, deya xabar beradi O‘zA.
Nikohi bekor bo‘lganlarning deyarli uchdan bir qismi 16-20 yosh oralig‘ida turmush qurgan. Eng achinarlisi, 55-60 foiz ayollar farzandlari bilan yolg‘iz qolmoqda.
Bu ma’lumotlar poytaxtda Vazirlar Mahkamasi huzuridagi “Oila” ilmiy-amaliy tadqiqot markazi tomonidan Xotin-qizlar qo‘mitasi, “Taraqqiyot strategiyasi” markazi bilan hamkorlikda “O‘zbekiston Respublikasida oila institutini mustahkamlash” mavzusida o‘tkazilgan anjumanda aytildi.
Bugungi davrda mutaxassislar oilalar yemirilishiga turli sabablarni ko‘rsatmoqda. Jumladan, erta turmush qurgan yoshlarning deyarli barchasidagi uzoq muddatli ruhiy siqilish, iqtisodiy yetishmovchilikdan kelib chiqqan nizolar, farzandsizlik dardi, xiyonat kabi illatlar oilalar mustahkamligiga ziyon keltirmoqda.
Shu bois keyingi yillarda oila, ota-ona va farzand munosabatlarini tartibga soluvchi mustahkam qonuniy mexanizm yaratildi va bu jarayon bugungi tezkor davr talablari bilan uyg‘un ravishda takomillashtirib borilmoqda.
Izoh (0)