Andijon viloyatining Bo‘z tumanidagi “Mustaqillikning 15 yilligi” mahallasida joylashgan 8-umumta’lim maktabiga kirar ekanmiz, asosiy binosidan kerosin aralashmasi qorishiq rangning badbo‘y hidi anqib turganiga guvoh bo‘lindi, deb yozadi O‘zA muxbiri.

Respublika ishchi guruhi vakillari bu yerga kelguniga qadar kompyuter xonasi butunlay yopib qo‘yilgan ekan. 15 dona kompyuter qarovsiz ahvolda yotibdi. 1983-yilda foydalanishga topshirilgan maktabda 24 nafar o‘qituvchi 256 ta o‘quvchiga tahsil bermoqda.

— Qancha vaqtdan buyon bu yerdagi kompyuterlar ishlamayotgan edi, — deb so‘raymiz maktab direktori Jo‘rabek Akbarovdan.

—Bir-ikki hafta bo‘ldi, faqat ikkitasi ishlab turibdi, — deydi direktor. — Elektr o‘chib-yonaverib, programmasi o‘zgarib ketibdi. Hechqisi yo‘q, hozir tuzatishadi.

Bu mujmal javobga oydinlik kiritish uchun tuman elektr tarmoqlari korxonasi rahbari Farhod Umrzoqov bilan telefon orqali bog‘landik.

— Chiroqlar o‘chib-yonaverib, maktablardagi kompyuterlarni kuydirib yuborayapti ekan. Zararini kim qoplaydi, — deb so‘raymiz tuman elektr ta’minoti rahbaridan.

— Kechirib qo‘yasizlar-ku, 2017-yil sentabrdan buyon elektr tarmog‘ida deyarli uzilish bo‘lgani yo‘q, — dedi u o‘z hayronligini yashira olmay. — To‘g‘ri, yanvar va fevral oylarida bir-ikki soatga onda-sonda uzilishlar kuzatildi. Lekin bu holat kompyuterlarning texnik buzilishiga asos bo‘la oladi, deb hisoblamayman. Biz yetkazilgan zarar haqida hech kimdan hech qanday ogohlantirish olganimiz yo‘q.

Maktabdagi biologiya-kimyo xonasining ham chiroqlari butunlay ishlamayotganiga guvoh bo‘ldik.

“Maktab kutubxonasi” deb ataluvchi kichik bir xonada esa 100 taga yetar-yetmas kitob bor ekan, xolos. Kutubxonachining aytishicha, kitoblar soni 380 ta bo‘lib, hozirda aksariyati o‘quvchilar qo‘lida qizg‘in o‘qish maqsadida olingan ekan. Kartotekalarni ko‘zdan kechirganda, bu fikr to‘g‘ri emasligi oydinlashdi.

Asosiy bino 2008-yilda kapital ta’mirlangan. Unga yondosh zamonaviy sport zali esa 754 million so‘mga 2016-yilda qurilgan. Yechinish-kiyinish zalidagi yuvinish xonalari eshigi burama mixlar bilan mustahkam yopib tashlangan ekan.

— Nega eshiklarni ochilmaydigan qilib tashladingiz, — so‘raymiz yana direktordan.

— Bahorgi ta’tilda eshiklarni berkitib qo‘ygan edik, — deya yolg‘on so‘zlar bilan vaziyatdan chiqishga urindi direktor. — Suv haydash nasosi kuyib qolgani sababli dush ishlamay turibdi.

Maktabning stadion atrofidagi 500 metr qo‘rg‘on devorlari 1983-yildan buyon o‘ralmay qolmoqda. Unga yondosh zovur esa chiqindilarga to‘lgan, quroq va qovg‘a o‘tlar o‘sib yotibdi, 2 yildan buyon tozalanmagan.

Maktabga shoshilinch yetib kelgan tuman xalq ta’limi bo‘limi mudiri Shavkatbek Mamarizayevning bildirishicha, tumanda 29 ta maktab bo‘lib, ularning 16 tasining 8000 metr tevarak-atrofi o‘ralmagan. Tumandagi 4 ta maktab kapital ta’mirga, 3 ta maktab joriy ta’mirga muhtoj, 3 ta maktabning tom qismi ta’mirlab ahvolda, 7 ta ta’lim muassasasida 2700 metr ichimlik suvi quvuri tortib kelish zarur.

— 2018-yilda budjetdan 3 ta maktabning devorini o‘rash uchun mablag‘ ajratildi, — deydi Sh.Mamarizayev. — 10, 22, 26-umumta’lim maktablarida 225 million so‘mlik ishlar olib borilmoqda. Maktablarning asosan, orqa tomoni o‘ralmagan. Kitoblar muammosiga kelsak, me’yorlarga ko‘ra har bir bolaga 4 tadan adabiyot to‘g‘ri kelishi kerak. Ammo tuman miqyosida bu ko‘rsatkich, 2,5-3 tadan ortmayapti. Bu muammoni homiylik asosida yechishni ko‘zda tutganmiz.

Kompyuter bilan to‘liq ta’minlanganmiz. 29 ta maktabda 36 ta xonada 530 ta kompyuter bor. Ularni qanday ishlatilayotgani, yaroqli-yaroqsizligi axborot-kommunikatsiya texnologiyalari bo‘yicha mutaxassisimiz har 6 oyda tekshiruv o‘tkazib, monitoring qilib borishi kerak. Albatta, hozirgi holat uchun maktab ma’muriyati aybdor va tegishli choralarni ko‘ramiz.