Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasida “AQShdagi vatandoshlar bilan madaniy va ma’rifiy aloqalarni yo‘lga qo‘yish” mavzusida videokonferensiya bo‘lib o‘tdi. Bu haqda “Xalq so‘zi” xabar bermoqda.
Unda O‘zbekistonning 17 ta vazirlik va jamoat tashkiloti mutasaddilari qatnashdi. AQShda yashayotgan o‘zbek diasporasi tomonidan Chikago shahridagi “O‘zbek — Amerika assotsiatsiyasi” prezidenti Olim Sharipov, Filadelfiya shahridagi “Yurtdosh” jamoat tashkiloti rahbari Sharofitdin Ziyamov, Atlanta shahridagi “O‘zbek jamiyati aloqalari” rahbari Jaloliddin Xo‘jayev, “Toshkent — Sietl” birodarlashgan shaharlar assotsiatsiyasi raisi o‘rinbosari Lola Zaxarova va mazkur jamoat tashkilotlarining faollari ishtirok etdi.
Toshkent vaqti bilan tonggi soat 8:00 da, AQSh vaqti bilan taxminan tungi soat 22:00 da bo‘lib o‘tgan ushbu virtual muloqot mazmunli va samimiy ruhda o‘tdi. Amerikada istiqomat qilayotgan vatandoshlar fikr-mulohazalari va takliflari bilan bo‘lishdi, muammolarni o‘rtaga tashladi.
— Bu yil “Toshkent — Sietl” assotsiatsiyasi tashkil etilganiga 45 yil to‘ladi. Shu bois rejalarimiz ham talaygina. 24 mart kuni Navro‘z bayramini nishonlaymiz. Tadbirimizda mingga yaqin kishi qatnashish istagini bildirdi. Ular orasida Sietl fuqarolari, shu yerda yashayotgan o‘zbek oilalari, shuningdek, bayramga kelish istagini bildirgan boshqa millat vakillari bor. Amerikaning boshqa shtatlari va Kanadadan ham mehmonlar tashrif buyuradi. Navro‘z Sietldagi o‘tkaziladigan eng katta xalq shodiyonalaridan biri hisoblanadi. Xuddi O‘zbekistondagi kabi qozonlarda osh damlab, sumalaklar tortiladi, o‘zbek milliy raqs va qo‘shiqlari ijro etiladi. Bizning tashkilotimiz turli sohalarda hamkorlik qilishga tayyor. Turizm, ta’lim, tibbiyot sohasi, yuridik sohalar bo‘yicha ikki davlat o‘rtasida hamkorlik aloqalarini yo‘lga qo‘yish niyatidamiz, — deydi “Toshkent — Sietl” birodarlashgan shaharlar assotsiatsiyasi raisi o‘rinbosari Lola Zaxarova.
Vatandoshlarni qiziqtirgan barcha savollarga yig‘ilishda ishtirok etgan mutasaddilar batafsil javob berdi. Tomonlar bunday tadbirlarni kelgusida ham muntazam ravishda o‘tkazishga kelishib oldi. Yaqin vaqt ichida turli loyihalarni hamkorlikda amalga oshirish bo‘yicha “Yo‘l xaritasi” ishlab chiqilishi ma’lum qilindi.
Izoh (0)