Namanganda Tojikistonning So‘g‘d viloyati, Asht tumani bilan chegaradagi “Pop” (“Navbunyod”) o‘tkazish punkti qaytadan ish boshladi. Bu haqda viloyat hokimligi axborot xizmati ma’lum qildi.

Mazkur maskanning ochilish marosimi tantana tusini oldi. Ikki mamlakat davlat va jamoat tashkilotlari vakillari, chegara hududida yashovchi fuqarolar karnay-surnay sadolari ostida bir-biriga quchoq ochdi.

Tadbirda ishtirok etgan Namangan viloyati hokimining birinchi o‘rinbosari Alisher Fayzullayev, So‘g‘d viloyati raisining o‘rinbosari Anvar Yoqubiy, Pop tumani hokimi A’zamjon Sultonov, Asht tumani raisi Mirdado Zarif Mirmuhammadiy va boshqalar o‘tkazish punkti faoliyatining qayta tiklanishi yaqin qo‘shnichilik munosabatlarini rivojlantirishda yana bir xayrli va muhim qadam ekanini ta’kidladi.