Yaponiya o‘z chegaralari yaqinidagi Rossiya bombardimonchi samolyotlari parvozidan xavotirga tushdi

Yaponiya mudofaa vaziri Itsunori Onodera G‘arb mamlakatlari Rossiyaga qarshi sanksiyalar joriy qilgach, rossiyalik harbiylarning faoliyati kuchayganini ma’lum qildi, deb yozadi “Gazeta.ru”.

“Rossiyalik harbiylar orasida turli nuqtai nazarlar mavjud, deb o‘ylayman, ammo ha, shunday taassurot uyg‘onadiki, go‘yo bunday faoliyat dunyo hamjamiyati Ukraina va Qrim yarim oroli tufayli Rossiyaga qarshi sanksiyalar kiritganidan keyin va Yaponiya dunyo hamjamiyati tarkibida ushbu sanksiyalarga qo‘shilganidan buyon kuchaygandek”, — dedi Onodera.

Vazirning xavotiri Rossiyaning ikkita Tu-95MS strategik raketa tashuvchi samolyotlarining Yapon va Sharqiy Xitoy dengizlari ustida amalga oshirgan havo soqchiligi bilan bog‘liqdir. Patrullik faoliyati 21-fevralda amalga oshirilgan.

Vazir mamlakatda doimo qo‘shni davlatlar, “ayniqsa, Xitoy va Rossiya”ni esda tutish kerakligini ta’kidladi.