Bugun, 15-fevral kuni taxminan soat 04:30 da Shayxontohur tumanidagi Bog‘ ko‘cha mahallasida joylashgan turar-joy uylaridan birida sodir bo‘lgan yong‘in oqibatida yetti kishidan iborat oila halok bo‘ldi. Bu haqda Toshkent shahar IIBB matbuot xizmatiga tayanib, “Xalq so‘zi” xabar berdi.
IIBBning yozishicha, mahalladagi 29-blokda joylashgan 22-uyda sodir bo‘lgan yong‘in oqibatida 200 kvadrat metr maydondagi uyning tomi, shifti va uy-jihozlari yong‘indan zararlangan hamda ushbu xonadonda yashagan fuqarolarning qisman kuygan holdagi jasadlari topilgan. “Gazeta.uz”ning yozishicha, halok bo‘lgan yetti kishidan uch nafari bolalardir.
Shuningdek, yong‘in qo‘shni uylarga ham tarqalib, 23-uyning 50 kvadrat metr va 21-uyning 15 kvadrat metr maydondagi tom qismini zararlagan.
Dastlabki taxminlarga ko‘ra, yong‘in gaz-isitish moslamalaridan ehtiyotsizlik bilan foydalanilganligi oqibatida yuzaga kelgan.
Hozirgi vaqtda mazkur holat yuzasidan surishtiruv ishlari o‘tkazilmoqda.
Izoh (0)