Бугун, 15 февраль куни тахминан соат 04:30 да Шайхонтоҳур туманидаги Боғ кўча маҳалласида жойлашган турар-жой уйларидан бирида содир бўлган ёнғин оқибатида етти кишидан иборат оила ҳалок бўлди. Бу ҳақда Тошкент шаҳар ИИББ матбуот хизматига таяниб, «Халқ сўзи» хабар берди.
ИИББнинг ёзишича, маҳалладаги 29-блокда жойлашган 22-уйда содир бўлган ёнғин оқибатида 200 квадрат метр майдондаги уйнинг томи, шифти ва уй-жиҳозлари ёнғиндан зарарланган ҳамда ушбу хонадонда яшаган фуқароларнинг қисман куйган ҳолдаги жасадлари топилган. «Газета.uz»нинг ёзишича, ҳалок бўлган етти кишидан уч нафари болалардир.
Шунингдек, ёнғин қўшни уйларга ҳам тарқалиб, 23-уйнинг 50 квадрат метр ва 21-уйнинг 15 квадрат метр майдондаги том қисмини зарарлаган.
Дастлабки тахминларга кўра, ёнғин газ-иситиш мосламаларидан эҳтиётсизлик билан фойдаланилганлиги оқибатида юзага келган.
Ҳозирги вақтда мазкур ҳолат юзасидан суриштирув ишлари ўтказилмоқда.
Изоҳ (0)