Jizzax viloyatidagi 5 ming 114 ta obyektga kuzatuv kameralari o‘rnatilishi rejalashtirilgan, deb xabar berdi “Daryo”ga viloyat IIB matbuot xizmati.
Bugunga qadar 2 mingga yaqin korxona va tashkilotlar 7 ming 170 ta ana shunday qurilmalar bilan jihozlandi. Asosan, chorrahalar, stadionlar, oliy va o‘rta maxsus kasb-hunar ta’limi va sog‘liqni saqlash muassasalari, bozorlar, masjidlar, yo‘l-patrul xizmati maskanlari, savdo, ovqatlanish, maishiy xizmat ko‘rsatish shoxobchalari, ko‘p qavatli uylar kuzatuv kameralari orqali nazoratga olinmoqda.
Bundan tashqari, IIB navbatchilik qismlarida Wi-Fi tizimi orqali tashkilot, korxona, muassasalar, savdo va ovqatlanish shoxobchalaridagi kuzatuv kameralariga ulanish va tasvirlarni ko‘rish imkoni yuzaga keltirilmoqda.
“Ushbu kameralar orqali 500 metr masofadagi voqealarni kuzatish mumkin. Raqamli uskunalar kunduzi 300—400, kechasi 200 metr uzoqlikdagi fuqaroning shaxsini aniqlash imkonini beradi. Tabiiyki, kamera borligini sezgan fuqarolar qonunga zid xatti-harakatlardan tiyilmoqda. Shuningdek, kuzatuvning bu usuli jinoyatlarni tez ochishga xizmat qilmoqda”, — deyiladi xabarda.
Xususan, 17-yanvar kuni Jizzax shahrida joylashgan “Zebo” savdo markazidagi shoxobchalardan birida o‘g‘rilik sodir bo‘lgan. Eshikni buzib kirgan shaxs shoxobchadan 12 dona uyali telefon, 1 ta noutbuk va 800 ming so‘m pulni olib chiqib ketgan. Kuzatuv kamerasidagi tasvir orqali o‘g‘ri ertasi kuniyoq qo‘lga olingan.
Izoh (0)