Joriy yil mart oyining uchinchi dekadasida Toshkentda “Afg‘oniston — tinch kelajak sari yo‘l” mavzuida xalqaro vazirlar konferensiyasini o‘tkaziladi. Bu haqda “Jahon” axborot agentligi xabar berdi.
O‘zbekiston tashqi ishlar vaziri Abdulaziz Komilovning ma’lum qilishicha, anjumanda BMT bosh kotibi Antoniu Guterrish, BMT bosh kotibining Afg‘onistondagi maxsus vakili Tadamichi Yamamoto, Yevroittifoqning tashqi ishlar va xavfsizlik masalalari bo‘yicha oliy vakili Federika Mogerini, shuningdek, Rossiya, Xitoy, AQSh, Hindiston, Eron, Pokiston, Turkiya, Saudiya Arabistoni va Markaziy Osiyo mamlakatlarining tashqi ishlar idoralari rahbarlari ishtirok etishi kutilmoqda.
Toshkent konferensiyasi tashabbusi bugungi kunda Afg‘onistondagi vaziyatni hal qilish jarayoniga jalb qilingan ko‘plab davlatlar tomonidan qo‘llab-quvvatlanmoqda. Xususan, BMT Xavfsizlik kengashi yig‘ilishida Rossiya tashqi ishlar vaziri Sergey Lavrov “Rossiya shu yilning martida bo‘lib o‘tadigan Afg‘oniston masalalari bo‘yicha vazirlar uchrashuvi yig‘ilishi tashabbusini ilgari surgan O‘zbekistonni qo‘llab-quvvatlaydi”, dedi.
1999-yilda Toshkentda O‘zbekiston tashabbusi bilan nizolashayotgan tomonlar vakillari, xususan, “Tolibon” hamda Afg‘onistonning qo‘shni davlatlari, Rossiya va AQSh ishtirokida “6+2” muloqot guruhi yig‘ilishi bo‘lib o‘tgandi. Muzokaralar yakunida Afg‘onistondagi mojarolarni tinch yo‘l bilan hal etish yuzasidan Toshkent deklaratsiyasi qabul qilingan. Xalqaro kuzatuvchilar O‘zbekistonning Afg‘onistonda tinchlik jarayonini targ‘ib qilish bo‘yicha muvaffaqiyatli tajribasini hisobga olgan holda, navbatdagi yig‘ilish afg‘on muammosini hal etishda muhim qadam bo‘lishi mumkin, deb hisoblamoqda.
Izoh (0)