Жиззах вилоятидаги 5 мингдан ортиқ объектга кузатув камералари ўрнатилади

Жиззах вилоятидаги 5 минг 114 та объектга кузатув камералари ўрнатилиши режалаштирилган, деб хабар берди «Дарё»га вилоят ИИБ матбуот хизмати.

Бугунга қадар 2 мингга яқин корхона ва ташкилотлар 7 минг 170 та ана шундай қурилмалар билан жиҳозланди. Асосан, чорраҳалар, стадионлар, олий ва ўрта махсус касб-ҳунар таълими ва соғлиқни сақлаш муассасалари, бозорлар, масжидлар, йўл-патруль хизмати масканлари, савдо, овқатланиш, маиший хизмат кўрсатиш шохобчалари, кўп қаватли уйлар кузатув камералари орқали назоратга олинмоқда.

Бундан ташқари, ИИБ навбатчилик қисмларида Wi-Fi тизими орқали ташкилот, корхона, муассасалар, савдо ва овқатланиш шохобчаларидаги кузатув камераларига уланиш ва тасвирларни кўриш имкони юзага келтирилмоқда.

«Ушбу камералар орқали 500 метр масофадаги воқеаларни кузатиш мумкин. Рақамли ускуналар кундузи 300—400, кечаси 200 метр узоқликдаги фуқаронинг шахсини аниқлаш имконини беради. Табиийки, камера борлигини сезган фуқаролар қонунга зид хатти-ҳаракатлардан тийилмоқда. Шунингдек, кузатувнинг бу усули жиноятларни тез очишга хизмат қилмоқда», — дейилади хабарда.

Хусусан, 17 январь куни Жиззах шаҳрида жойлашган «Зебо» савдо марказидаги шохобчалардан бирида ўғрилик содир бўлган. Эшикни бузиб кирган шахс шохобчадан 12 дона уяли телефон, 1 та ноутбук ва 800 минг сўм пулни олиб чиқиб кетган. Кузатув камерасидаги тасвир орқали ўғри эртаси куниёқ қўлга олинган.