O‘zbekiston hukumati qarori bilan Samarqand, Buxoro, Xiva va Shahrisabz shaharlarida xavfsiz turizmni ta’minlash konsepsiyasi tasdiqlangandi. Bu haqda O‘zA xabar bermoqda.
Mazkur konsepsiyada Samarqand, Buxoro, Xorazm va Qashqadaryo viloyatlari IIBlarida xavfsiz turizmni ta’minlash boshqarmalari tashkil etilishi, ularning boshliqlari bir vaqtning o‘zida IIB boshlig‘ining o‘rinbosari hisoblanishi, shaxsiy tarkib esa tanlov asosida, birinchi navbatda, chet tillarni biladigan xodimlar safidan shakllantirilishi nazarda tutilgandi.
Samarqand viloyati IIB jamoatchilik va ommaviy axborot vositalari bilan aloqalar guruhi ma’lumotiga ko‘ra, Samarqandda ham xavfsiz turizmni ta’minlash boshqarmasi tashkil etildi. Boshqarma uchun alohida bino ajratilib, bugunga qadar 50 ga yaqin xodim ishga qabul qilindi. Inspektorlar transport va aloqa vositalari bilan ta’minlanmoqda.
Xodimlar safiga Samarqand davlat chet tillar institutini bitirayotgan, ingliz, fransuz, yapon, koreys va boshqa xorijiy tillarni puxta o‘zlashtirgan hamda tarix, qadimiy obidalar va milliy qadriyatlar haqida chuqur bilimga ega bo‘lgan talabalar ham suhbat asosida qabul qilinmoqda.
Xavfsiz turizmni ta’minlash xizmati xodimlari tibbiyot qutisi, Samarqandning tarixiy obida va madaniy obyektlari sxemasi bo‘lgan kichik xarita bilan ta’minlangan. Ular asosan turistlar gavjum bo‘ladigan joylar, tarixiy obidalarda ish olib boradi.
“Foliyatimiz sayyohlik maskanlarida xavfsiz turizmni tashkil etishdan iborat. Bu faqat sayyohlarning xavfsizligini ta’minlash emas, balki ularga zarur yordam ko‘rsatishni ham nazarda tutadi. Misol uchun, sayyohning tobi qochsa, unga birinchi tibbiy yordam ko‘rsatib, shifoxona yoki mehmonxonaga yetkazish, adashib qolgan sayyohlarni ular izlayotgan manzilga kuzatib qo‘yish ham xizmat vazifamizga kiradi”, — deydi inspektor Fotima Rahmatova.
Izoh (0)