2015-yilgi Parij teraktlarini uyushtirishda ayblanayotgan Saloh Abdislomga qarshi sud jarayoni 5-fevral kuni Bryusselda boshlanadi, deb yozadi “TASS”. U Belgiyada 2016-yilda qo‘lga olishga urinish chog‘ida politsiya bilan otishmada qatnashgani uchun sud qilinadi.
Abdislom sud majlisiga o‘zi hibsda saqlanayotgan Fransiyadan politsiya vertolyotida keltiriladi. Sud binosida va terrorchining atrofida “favqulodda xavfsizlik qoidalari” amal qiladi. Zalga ikkita kamera o‘rnatiladi, bu esa jurnalistlarga boshqa xonada turib, sud jarayonini kuzatish imkonini beradi.
Parijda 2015-yil 14-noyabrga o‘tar kechasi yuz bergan teraktlar oqibatida 130 ga yaqin odam halok bo‘ldi, 350 dan ortiq kishi turli darajada jarohatlandi. Yuz bergan hodisa Yevropada so‘nggi o‘n yilda kuzatilgan eng qonli terakt, deb ataldi.
Abdislom yetti terrorchidan biri bo‘lgan, ammo xudkushlik kamari ishlamay qolgan yoki uning o‘zi so‘nggi lahzada portlovchi qurilmani harakatga keltirmagan. 2016-yilning martida qo‘lga olinguniga qadar jangari Bryusseldagi muhojirlar hamjamiyatida yashovchi do‘stlarining uyiga yashiringan.
Izoh (0)