Iroq armiyasi mamlakatning Saudiya Arabistoni bilan chegarasidagi cho‘lni IShID terrorchilik tashkiloti jangarilaridan tozalash bo‘yicha operatsiyani boshladi. Bu haqda Iroq g‘arbidagi Anbar viloyatida turgan qurolli kuchlar qo‘mondoni, general-mayor Mahmud al-Falaxiy ma’lum qildi, deya xabar bermoqda “Kommersant”.
“Armiya, politsiya va qabila ko‘ngillilari bo‘linmalari, shuningdek, Iroq va xalqaro koalitsiya harbiy-havo kuchlari ko‘magida harakat qilayotgan chegara qo‘shinlari bugun tongdan Anbar cho‘lini Iroq—Saudiya yo‘nalishi bo‘ylab tozalash bo‘yicha keng miqyosli operatsiyani boshladi”, — dedi harbiy qo‘mondon.
Eslatib o‘tamiz, dekabr oyi boshida Iroq bosh vaziri Haydar al-Obodiy mamlakat IShID ustidan g‘alaba qozonganini e’lon qilgan edi. U Iroq armiyasi Suriya bilan chegaradosh barcha hududlar ustida nazorat o‘rnatgani, shunday qilib, IShIDga qarshi urush g‘alaba bilan yakunlanganini ma’lum qilgan edi.
Izoh (0)