Toronto politsiyasi odamlarni o‘ldirib, ularning tana qismlarini o‘zi ishlagan joylarda gultuvaklar va gulzorlarga yashirib qo‘ygan deb taxmin qilinayotgan 66 yoshli landshaft dizaynerini hibsga oldi, deb xabar beradi CNN.
Bryus MakArtur jami beshta jinoyatda ayblanmoqda, ammo keyinroq boshqa qurbonlar haqida ham ma’lum bo‘lishi kutilmoqda.
MakArtur bog‘bonlik qilgan 30 dan ortiq joylar tekshirilib, ba’zi hududlardan tuvakdagi o‘simliklar tadqiq etish uchun olib ketildi.
Qotilliklarni tekshirish bilan shug‘ullanayotgan detektiv Xenk Idsing MakArtur seriyali qotil deb taxmin qilinayotganini aytdi.
Qurbonlarning barchasi 44—58 yoshdagi erkaklar bo‘lib chiqdi. Ulardan biri 2012-yilda, boshqasi 2015-yilda, yana ikki nafari esa 2017-yilning birinchi yarmida bedarak yo‘qolgan deb e’lon qilingan. Qolgan bir erkakni hech kim qidirmagan, u 2016-yilning mayi va 2017-yilning iyuli oralig‘ida o‘ldirilgani gumon qilinmoqda. Jinoyatchi o‘z qurbonlarini aynan qanday tanlagani noma’lum.
MakArtur ustidan sud 14-fevralda boshlanadi.
Izoh (0)