Aqto‘bedagi fojiadan so‘ng Qozog‘iston hududidagi barcha yo‘nalishdagi avtobuslarni tekshirishga qaror qilindi. Bu haqda Qozog‘iston investitsiyalar va rivojlanish vazirligi matbuot xizmati ma’lum qildi, deb xabar beradi “Kapital.kz”.
“Avtobus” tezkor-profilaktik tadbiri Transport qo‘mitasining hududiy inspeksiyalari IIV ma’muriy politsiyasi xodimlari bilan hamkorlikda o‘tkazilmoqda.
Tekshiruv 22-yanvardan 18-fevralgacha muddatda bo‘lib o‘tadi va tumanlararo, shaharlararo, viloyatlararo va xalqaro qatnovlarda yo‘lovchi va yuk tashish bilan shug‘ullanadigan transport va haydovchilarni qamrab oladi.
Yo‘lovchi avtobuslari va taksilar texnik holatida nosozliklar, xavfsizlik talablariga muvofiq kelmasligi aniqlanganda ulardan foydalanishni man etishgacha bo‘lgan choralar ko‘riladi. Avtotransport yo‘nalishga chiqishdan oldin texnik, haydovchilar esa tibbiy ko‘rikdan o‘tkazilishi, mehnat va dam olish tartibiga rioya etilishiga alohida e’tibor qaratiladi.
Shuningdek, jamoatchilik vakillari va transport nazorati inspeksiyasi xodimlaridan iborat mobil guruhlar tuziladi. Ular avtotransport harakatlanishining ehtimoliy yashirin yo‘nalishlarini aniqlash bilan shug‘ullanadi.
Izoh (0)